Oduber: AHATA ta manipula cu informacion incorecto na gremio

ORANJESTAD - E reunion entre minister di turismo Otmar Oduber y AHATA riba e ley di all inclusive a tranca diabierna. Segun e minister a splica NoticiaCla.com, AHATA a manipula cu informacion incorecto na e gremionan. E problema entre otro ta e carta cu AHATA a manda pa e mandatario, cu lo ta troce su palabranan. Algo cu e ta considera inaceptabel. NoticiaCla.com a tuma contacto cu AHATA su presidente Jim Hepple, pero e no a haya reaccion ainda riba e peticion pa comentario. No ta conoci ki dia e reunion lo continua, of si e lo continua at all. Hecho ta cu partidonan a sali for di otro sin un solucion. Y mester bisa cu esaki ta e di tres intento, ya cu den e prome reunion partidonan no a haya otro, y e otro intento AHATA a cancela. 

AHATA TA TROCE PALABRA Y MAL INFORMA GREMIONAN

"Mi ta lamenta y condena e hecho cu AHATA awo, despues di cancela e ultimo dos reunionan, ta bay asina leu di troce mi palabranan ( den un carta ) y mal informa stakeholdernan. E forma inetico aki di engaña gremionan pa asina por defende nan posicion ta simplemente inaceptabel" Oduber a bisa NoticiaCla.com diasabra mainta. E ta mustra riba e carta cu AHATA a manda pa su miembronan, ariba e posicion di gobierno den un carta unda cu ta pidi e sosten di e miembronan. E contenido ,- segun Oduber-, no ta cuadra cu berdad. Entre otro ta papia cu Oduber lo a priminti un cooling off period di 12 luna (un aña) sin cu a discuti e problemanan. Un otro punto cu e mandatario ta desmenti, ta cu elo a bisa cu ta revoca e ley. "Absolutamente esey no ta berdad" Oduber a sigui bisa.

E CARTA DI AHATA

Den e carta cu NoticiaCla.com a pone su man ariba, AHATA ta splica minister Oduber cu como 'follow up' riba un declaracion cu gobierno (di ta dispuesto pa revoca of para e ley di AI pa un periodo di 12 luna), un grupo di hotel cu no ta 100% all inclusive ta priminti di e.o. lo no converti nan propiedad den all inclusive, y tampoco lo bende nan propiedad na un operador 100% all inclusive. E hotelnan cu a bay di acuerdo ta un total di 8, cu ta Brickell Bay, Bucuti y Tara Beach, Manchebo Beach Resort, Renaissance Aruba, The Aruba Marriott, The Hyatt Regency, The Ritz Carlton Aruba, The Tropicana Aruba. Notabel ta cu ta apenas 8 hotel a logra firma esaki di e cantidad di hotel cu tin na Aruba cu no ta 100% all inclusive. Foto di archivo di noticiacla.com di reunion anterior entre AHATA y minister Oduber.