APA a pidi polis yuda resolve situacion caotico den porta di waf

ORANJESTAD – Aruba Ports Authority (APA) a pidi polis yuda resolve situacion caotico den porta di waf. E ta confirma asina e informacion cu polis a suministra cabamento di siman, unda cu nan a bisa cu nan lo cuminsa tene control mas rigoroso riba waf, despues di a haya hopi critica di turistanan crucero. Como tal e representantenan di e departamento di seguridad y di Mercadeo di APA a entrega un peticion oficial na Robert Vos, Hefe di Polis di Bario na Oranjestad pa formalisa e peticion di ayudo aki. E intencion ta pa e ayudo tuma lugar riba dianan cu tin barco crucero den haf. APA a bisa tambe cu lo implementa un test-case den cooperacion pa mehora e prome impresion di e turista crucero, ora cu nan baha for di e bapor.

Den pasado APA a hasi numeroso intento pa soluciona e situacion den porta di waf, cu no ta cay bou nan maneho, sin e resultado desea. Como tal e biaha aki a hasi un entrega oficial di un peticion firma pa Director di APA, Sr. Jossy Figaroa, pa expresa e preocupacion y pa solicita cooperacion di Polis di Bario durante e dianan cu tin barco crucero den waf y sugeri un solucion pa e problematica.

Den cuadro di e peticion aki dialuna mainta e hefe di seguridad di APA, Ronnie Angela, asisti pa Marcelino Angela y Tamara Waldron cu ta hefe di mercadeo y asuntonan di comunicacion, a reuni cu  Vos y Thiel pa discuti e situacion actual y sondea un solucion permanente pa e sucedido nan bon conoci pa hopi aña. APA a trece padilanti cu e “harassment” pafo di e entrada principal di APA ta un preocupacion creciente serca e organisacion particularmente pasobra no solamente e ta crea un prome impresion amargo cerca e bishitante pero tambe un sentido di inseguridad cerca e turista.

E peticion specifico di APA ta pa e autoridad local cu tin e derecho legal pa ehecuta reglanan di comportacion ariba caminda publico den e area menciona, regula e actividadnan di benta di tour y huurmento di auto na un manera cu ta converti e experiencia di e bishitante crucero den uno mas agradabel y sigur. Polis di Bario di Oranjestad a comprende e preocupacion di APA y a informa cu lo haci un esfuerzo special pa cumpli cu e peticion di APA.

Segun autoridad di APA, ta di suma importancia pa implementa e normanan di comportacion civil na bienestar di nos pais en general y particularmente na beneficio di e comunidad portuario, cu tambe ta depende economicamente di e turista crucero. Segun Angela, nan kier preveni cu e aglomeracion di hende y actividad den entrada di haf di Oranjestad crea un impresion negativo serca e bishitante cu lo hasi e turista sinti “unsafe”, cu e resultado cu e ta regresa e barco sin bishita Aruba, asina perhudicando nos tur.” Esaki pasobra Aruba ta un isla conoci como un di e mihor “port-of-call “nan den region. Actonan bruto dilanti e entrada principal di waf por causa daño na e imagen aki. APA ta pidi cooperacion di tur miembro di e comunidad portuario pa traha hunto y sostene e bon imagen di Aruba. Dialuna polis di bario a cuminsa cu e “test case” na e entrada di waf den preparacion pa e high-season venidero.