Kooyman a entama caso contra sindicato pa evita blokeo di entrada

ORANJESTAD - Cu e intencion di evita mas blokeo pa nan lugar, gerente di e Kooyman, Yuri Kooyman a confirma na NoticiaCla.com cu a entama un caso sumario. Despues di reunionan henter dia cu intervencion di mediado di gobierno, e situacion laboral na Kooyman ta mescos. Trahadonan a reuni cu sindicato diabierna atardi. Nan a blokia e entradanan di e tereno pa dos ora, y gerencia a haya su mes ta entama un caso sumario pa para e blokeo. Mientrastanto polis a kita e blokeo (temporalmente), y tin un reunion planea pa diabierna anochi 7'or cu intermediacion di mediado atrobe. Tanto e gerente Yuri Kooyman, como representante di sindicato FTA Rudy Geerman a mustra cu nan ta spera pa un solucion. 

PROPOSICION MODIFICA

Kooyman a splica NoticiaCla.com diabierna atardi cu nan a aumenta nan proposicion anterior cu aumento di lumpsum di 300 florin te na 1000 florin, cu por wordo paga awor of reparti den algun aña. Mas cu esey nan no por haci awor. Sindicato a rechasa e proposicion ey awe merdia cu a pone cu pa 3'or partidonan a bay for di otro sin un acuerdo. Eynan a blokea e entrada den forma di protesta, cu pa algo prome cu 5'or a wordo remedia cu intervencion di polis. Kooyman a confirma tambe na NoticiaCla.com cu awe a entama un caso sumario pa evita mas blokeo. "Nos no sa si tin mas blokeo" Kooyman a bisa. E resultado di e caso no ta conoci ainda y e ta spera di haya un contesta pronto riba esey. 

ACCION 

Pa loke ta e accion, esaki no a caba 'ainda' y partidonan ta spera cu despues di e reunion di awe nochi 7'or lo por tin un solucion pa ambos banda, of por spera continuacion di e accion. Kooyman a confirma na NoticiaCla.com cu obviamente e compania a sufri perdida e siman aki. "Clientenan ta wordo bisa pa bay cumpra otro caminda. Entrada pa e lugar ta wordo blokia. Claro cu nos ta sintie", Kooyman a bisa. Pero e tin speransa cu cos lo keda soluciona. REACCION FTA

Den un comentario breve pa NoticiaCla.com, Rudy Geerman a confirma e loke cu Kooyman a bisa pero no kier a duna mas detayes. "Nos ta prefera bisa algo awor despues di e reunion di awe nochi", Geerman a bisa NoticiaCla.com diabierna atardi.