Plataforma SSV ta yega Aruba awe y ancra pazuid di nos isla

ORANJESTAD - Directie Scheepvaart Aruba ta yama Bon Bini na Aruba e Plataforma SSV Safe Regency cu lo ta yegando awe diabierna y lo bay ta ancra pazuid di Aruba banda di e dos drillships: Pacific Meltem y Pacific Mistral.

Esaki sigur ta un otro proyecto grandi pa Aruba. E plataforma aki a haci un viahe largo di Campeche Bay, Mexico; despues cu e tabata na e.o. Hulanda, Latvia y Norway na januari ultimo.

Na aña 2013 a haci un estudio riba e futuro di e sector maritimo di Aruba. For di estudio aki a conclui cu Aruba mester desaroya algun actividad maritimo pa por crea entrada adicional pa Pais Aruba. Un di actividad nan menciona ta ancra den nos awa nan territorial. Den cuadro cu esaki e maneho di Minister di Transporte ta dirigi pa promove riba Mercado international e posibilidad pa ancra den nos awa nan territorial creando asina entrada adicional pa Pais Aruba.

E plataforma no ta pa bora pa petroleo, pero ta hospeda personanan cu ta labora riba e plataforma cu si ta den operacion. E plataforma aki no ta den operacion den nos awa nan territorial, si no solamente ancra.

E plataforma ta registra bou di bandera di Singapore y tin mas o menos 780 “beds” y tin 88 “workstations”. E plataforma a scoge pa bin Aruba pa motibo di seguridad cu nos ta brinda. Kustwacht ta tene debido control den nos awa nan teritorial, nos awa nan ta poco profundo y ademas relativamente trankil.

Minister Oduber ta hopi contento cu e rapport “Maritieme Toekomst van Aruba” cu ta dunando fruto. E vision di Minister Oduber ta pa crea un pilar economico di sector maritimo cu dia pa dia ta birando mas factibel.

E plataforma ta planea pa keda ancra den nos awa nan teritorial pa mas o menos un aña mirando e desaroyo mundial insigur den e mundo petrolero.