Rapport PWC ta domina lista di pregunta di parlamento riba AI

ORANJESTAD - Un lista di 138 pregunta a keda manda pa minister di turismo Otmar Oduber riba e topico di cambio di ley di All Inclusive. Riba e lista di pregunta cu NoticiaCla.com a pone su man ariba, por nota cu hopi interes ta wordo poni e.o. riba e rapport di PWC of e falta di esaki, dealnan pendiente di hotel, y un peticion concreto di un partido pa 'wanta cu e ley te ora tin un investigacion mas profundo'. NoticiaCla.com mientrastanto a compronde cu awe mainta e minister a keda di entrega e contestanan riba e preguntanan. Sinembargo no tin fecha ainda pa trata esaki ainda. 

E PREGUNTANAN

Fraccion di AVP siendo e fraccion mas grandi, tabata esun cu mas pregunta cu 63 na tur. Por lo menos 20 pregunta tabata basa riba e rapport di PWC, cuestionando su existencia, of falta di esaki, su obhetividad, experticio, hecho cu e ta 'incompleto' y mas. Fraccion di MEP a haci 44 pregunta 'regular' mientras a haci 16 pregunta riba e memorandum adicional. Partido Democracia Real tabata esun cu menos pregunta (15) pero preguntanan mas concreto y largo formula. Democracia Real ta e unico partido cu concretamente a informa caba por escrito cu e lo pidi pa un periodo extra pa por analisa e ley, esta cu no ta pro pa vota pa e ley awor pasobra kier pa tin mas investigacion. Mientras cu otro fraccionan tambe ta sugeri den e direccion ey, nan no ta haci e pregunta concreto ainda. 

PREOCUPACION DI AVP

E preocupacion mayor di AVP ta parce di ta e asunto di 'other accomodations' esta cambernan di hospedahe cu no ta hotel, sino apartamento of condominium. For di e investigacion cu AVP a haci, ta resulta cu e cantidad di camber 'otro' cu uno di hotel 'normal', ta yega na 2000. Ademas nan a compronde cu tin 'promesanan haci' cu hotelnan existente pa aumenta e cantidad di camber cu 1600 camber mas. Esaki ta e preocupacion di e fraccion berde e.o. Nan lo kier sa kico ta e maneho y con tin pensa di atende cu e parti specifico di 'otro acomodacion'. 

PREOCUPACION DI MEP

Fraccion di MEP ta preocupa of kier claridad riba e cantidad di camber All Inclusive cu lo por bin acerca cu e ley di AI manera e ta poni aworaki. Nan investigacion ta mustra cu ta trata di 1500 camber extra por bin acerca di all inclusive, mientras cu minister ta papia di 500 pa 600. Ademas MEP tin informacion cu tin varios hotel extra na caminda, manera Iberostar Hotel cu 360 camber y Princess Hotel na Eagle cu 600 camber extra. Esey ta e preocupacion mayor di e fraccion. 

DEMOCRACIA REAL

Gran parti di e preocupacion di e fraccion di Democracia Real, ta e rapport di PWC y su legalidad y e tipo di informacion cu tin aden. Pero mas cu tur, Democracia Real ta preocupa cu e aspecto legal cu e cambio di ley aki por tin pa cu e companianan cu lo wordo afecta. E fraccion ta premira casonan miyonario legal cu lo disputa e ley aki y cu na final di dia por afecta e imagen turistico di Aruba internacionalmente. Y na final, PDR ta e unico partido cu ta bisa caba cu nan lo pidi pa wanta e ley aki pa duna tempo pa mas investigacion.