Lopez: Reunion riba CITGO deal otro siman pa aclarea esaki

ORANJESTAD - Pa haya mas claridad riba e contracto di CITGO Aruba cu gobierno di Aruba, parlamento lo trata esaki den un reunion publico otro siman. Asina presidente di parlamento Marisol Lopez Tromp a declara awe mainta. Segun Lopez Tromp, e reunion ta pidi pa entre otro AVP y MEP y mester clarifica hopi cos prome cu e reunion mes pa e ley wordo trata. Esey si no a drenta parlamento ainda. E intencion ta pa yama e ministernan respectivo den parlamento pa nan contesta e preguntanan. 

CONFUSION RIBA E DEAL

Motibo di e peticion segun Lopez ta cu tin hopi pregunta y tur dia esey ta bira mas. Ora cu ayera a bira conoci tambe cu pa medio di un relato oficial di CITGO mes riba nan website, nan ta informa e.o. cu nan no ta esunan cu ta bay inverti den e proyecto na Aruba sino ta 'meramente' acesora cu asistencia tecnico etc, e asunto a bira aun mas preocupante. Esaki pasobra e ta contradeci e loke cu minister de Meza a bisa recientemente, esta cu ta CITGO Petroleum lo ta responsabel pa e refineria. 

KEN TA FINANCIA E PROYECTO

Manera cu e comunicado mes ta bisa "CITGO Aruba", un grupo di compania operando bou di PDV Holding (Un subsidiario di PDVSDA) lo opera e facilidad, cu CITGO Petroleum proveendo servicio na e grupo aki.". E otro punto interesante cu a hala atencion ta e hecho cu ta papia cu e proceso di converti e refineria den e operacion cu a firma p'e, lo costa entre 450 pa 650 miyon florin, y esaki lo 'mester keda obteni di fuentenan financiero externo'. Esaki ta nifica cu no ta CITGO Petroleum lo financia esaki, contrario na declaracionan haci anteriormente.