Admision culpabilidad Rincón a reduci su castigo di prison

HOUSTON - E admision di culpabilidad di comerciante Venezolano Roberto Rincón diahuebs dilanti hues federal ta parti di un acuerdo pa reduci su castigo di prison te na 13 aña. Asina e agencia di noticia Bloomberg ta raporta. E cargonan ta soborno di oficialnan di PDVSA pa obtene contractonan balora te na 1 biyon dollar. Sin e acuerdo aki, Rincón lo por a haya castigo di prison di mas di 100 aña. 

GEBOEID DEN CORTE

Rincón a aparece den corte diahuebs geboeid na man cu pia, acompaña pa guardia. Contestando tur pregunta cu ayuda di un traductor, y a admiti tur loke a wordo presenta su dilanti. Cu esaki, e ta evita un caso largo y awor tin cu solamente warda e sentencia di hues dia 30 di september proximo. Di otro forma e caso lo mester a bin dilanti otro siman na Houston mes. "Rincón kier cera e capitulo aki di su bida y rehabilita su reputacion comercial" abogado Sam Louis a bisa despues di e audicion dilanti hues Miller. 

ADMITI CULPABILIDAD

Manera cu NoticiaCla.com a raporta ayera caba, comerciante Venezolano Roberto Rincón a admiti culpabilidad di cargonan cu ta envolvi participacion den un eskema pa den forma coruptivo, obtene contractonan di PDVSA. Asina Reuters ta informa for di di departamento di husticia Mericano diahuebs. Rincon (55) a admiti culpabilidad den un corte federal pa dos cargo incluyendo conspiracion pa viola e acto di practica coruptivo internacional.

AMIGO A DECLARA CULPABILIDAD CABA

Luna pasa su amigonan comerciante a admiti culpabilidad caba di soborno den cargonan federal na Merca. Ta trata di e Venezolanonan biba na Florida Abraham Shiera, 52, y cuater otro persona cu a haci e admision aki. E cargonan ta soborno envolviendo miyones di dollar den contracto entre companianan Mericano di energia y e compania petrolero PDVSA.   

WINE AND DINE

Oficialnan di PDVSA a wine and dine den hotelnan luhoso, y unda cu a te hasta a caba paga hipoteca completo di un cas, como recompensa na Texas. E caso ta wordo monitoria seriamente na Venezuela unda cu oposicion ta acusando e socialistanan gubernamental di a comete un estafa na PDVSA y laga e pais den un posibel bancarota. 

CULPABILIDAD NA SOBORNO Y FRAUDE 

Shiera a admiti culpabilidad na soborno internacional y fraude diamars dilanti un hues federal. E ta wordo sentencia na juli proximo. Shiera na december ultimo a wordo nombra den un acusacion formal di 18 cargo, hunto cu su amigo Roberto Rincón (55), ora cu ambos a keda deteni na Merca. Ambos ta acusa di labamento di placa y violacion di e acto di practica coruptivo federal Mericano, cu ta prohibi pago na oficialnan gubernamental internacional pa asisti cu dealnan comercial. Rincón su caso mes ta tuma lugar otro luna (april).  Otro cuatro persona, incluyendo tres oficial di PDVSA, a admiti culpabilidad di soborno. Nan a admiti di a tuma placa di sea Shiera of Rincón pa yuda e dos comerciantenan Venezolano logra contractonan energetico lucrativo, y a conspira hunto cu Rincón y Shiera pa labamento di ganashi. E tres hombernan Jose Ramos, 38, Christian Maldonado, 39, y Alfonzo Gravina, 53, a admiti culpabilidad na december ultimo di labamento di placa.  

RELACION CU ARUBA

Tabata na december ora cu e nomber a bira conoci di Rincón, pa su relacion comercial fuerte cu Aruba, y e implicacion di Aruba den su operacionnan comercial. E momento di su detencion, a bin sali na cla cu gobernantenan di Aruba tabata conoce y deal cu ne na algun ocasion algun aña prome. Pero riba pregunta di e.o. NoticiaCla.com e tempo ey, mientras tanto ministernan Paul Croes y Mike de Meza a admiti di a reuni cu Rincón na varios ocasion, nan no tabata na altura di e practicanan ilicito di Rincón e tempo ey. Minister colega Benny Sevinger a te hasta admiti cu e mes a 'google' e nomber Rincón y no a haya nada 'malo' y como tal a otorga permiso pa cierto tereno. E mandatario recientemente a splica NoticiaCla.com, cu 'tur hende ta google y cu no ta nada malo y straño pa uza e forma ey pa haya informacion di un persona asina. "Bisa mi ken no ta google awendia" e mandatario a sigui bisa. 

NEGOCIACION CU CITGO

E asunto di Rincón a bin net den tempo di negociacion cu e compania CITGO como posibel partner di reapertura di e refineria. E mandatario di energia Mike de Meza a admiti na NoticiaCla.com e tempo ey cu enberdad Rincón tabata instrumental pa 'set up' reunionan cu partnernan strategico, pero cu e no tabata 'e unico'. Pregunta cu si e situacion di Rincón por stroba e negociacion y tin un implicacion negativo pa Aruba y su gobierno, a wordo desmenti pa gobernantenan na NoticiaCla.com e tempo ey.