Hues: Rocky Kelly por protesta contal cu keda den margen di ley

ORANJESTAD - Corte a dicta den caso di e conocido ciudadano "Rocky" Kelly pa su actonan di destruccion. Kelly a wordo acusa di 4 diferente hecho castigabel. For di esaki el a haya vrijspraak pa 2, a haya reduccion di castigo di uno y e ultimo so hues a mustra cu Kelly tabata robes. Interesante ta e hecho cu corte a mustra Kelly riba e hecho cu e tin pleno derecho di haci accionnan di protesta, pero cu na mes momento e tin cu percura si pa e mantene su mes den margennan di ley. 

CARGONAN CONTRA KELLY

E cargonan cu a acusa Kelly di dje tabata : 1. Cende na candela algun bari meymey di caminda dilanti edificio di parlamento cual a trece bida di hende y bienes di otro na peliger;   2. Cende na candela su auto riba acera dilanti edificio di Parlamento cual hecho a trece bienes di otro na peliger;    3.Destrui of causa daño na e plywoodnan poni dilanti ex-Bushiri hotel;   Cende na candela un cantidad di tire dilanti edificio di VNO cual hecho a trece bienes di otro na peliger;  

CONSIDERACION DI FISCAL

Fiscal a considera e hechonan proba, cu excepcion di e prome y a exigi un castigo di 91 dia di prizon, di cual 60 ta condicional y e resto (31 dia) a wordo sinta caba den detencion preventivo. Ademas a pidi tambe un castigo di 80 ora di trabou pa comunidad y un tempo di prueba di 2 aña.  Kelly a haya oportunidad di hiba palabra y ela splica hues ampliamente e motibonan pa cual ela yega na haci e actonan menciona. A mustra riba e hecho cu a trata na diferente manera di yama atencion di Gobierno pa situacionnan cu den su opinion no ta bayendo di forma corecto, pero esakinan tawata envano. Esaki a hiba tambe na escalacion di e protesta, cual a culmina den diferente candela na lugarnan strategico na Aruba. 

DEFENSA DI KELLY 

Di parti di defensa a wordo treci dilanti cu igual na Fiscal ta haya cu e prome hecho no por wordo proba, pero cu pa mes motibo tampoco ta haya cu e segundo hecho por wordo proba. Cendemento di obhetonan na candela riba su mes no ta un acto castigabel. Esaki ta bira castigabel na momento cu tin peliger pa persona of bienes di otro. Tanto den caso di e barinan na candela como tambe di e auto, Kelly a actua di tal forma cu deliberadamente a uza materialnan como tambe un locacion cu no lo trece ni persona ni bienes na peliger. Tanto e barinan como e auto tawata localisa na un distancia grandi di cualkier persona of otro obhetonan den cercania. E investigacion no por proba tampoco cu e cantidad di gasoline den e auto tawata sificiente pa por a causa un explosion cu lo por a causa algun daño.   Pa locual ta e plywoodnan dilanti ex-Bushiri defensa tampoco ta haya cu por a proba destruccion, como cu e integridad di e structuranan a keda intacto. Daño si tawatin, mas esaki tawata limita na manchanan preto di huma.  Pa cu e candela na VNO defensa ta haya cu igual na e otronan, no tawatin peliger pa bienes. Tampoco tawatin pruebanan cu por a sostene e ponencia di VNO cu tawatin daño na nan borchi of cura. 

SENTENCIA DI HUEZ

Hues a bay di acuerdo cu e ponencia di defensa den acusacionnan 1 y 2. Ela haya cu mester duna Kelly beneficio di duda, como cu e investigacion pa cu e peliger potencial di explosion di e auto no a wordo haci debidamente. Pa cu hecho 3 tambe hues tawata di acuerdo cu no por a proba destruccion, sino unicamente hacimento di daño. Pa cu hecho 4 si hues a haya cu ta proba cu tawatin peliger pa bienes di otro, como cu e borchi di VNO a ricibi daño.  Mirando cu Kelly a wordo haya liber di culpa di diferente di e acusasionnan hues a baha e castigo cu a wordo solicita na 30 dia condicional cu un tempo di prueba di 2 aña. Finalmente Corte a mustra Kelly riba e hecho cu e tin pleno derecho di haci accionnan di protesta, pero cu na mes momento e tin cu percura si pa e mantene su mes den margennan di ley. Foto Rocky Kelly di YouTube.