Autoridad colombiano ta confirma detencion Giovanni vd Pool

WILLEMSTAD – Autoridad oficial di Colombia (dept di inmigracion) a confirma dialuna mainta cu enberdad e ciudadano ‘hulandes’ Geovanni Adelberto de Pool, a keda deteni ora cu e tabata purba pasa frontera entre Venezuela y Colombia (lesa e confirmacion colombiano aki) . Awor ta procesa su detencion y ta warda e peticion di extradicion for di Corsou. Ministerio Publico di Corsou diadomingo ainda no por a confirma e noticia na NoticiaCla.com di e detencion. Pero si cu Corsou a haci un peticion di detencion di van der Pool, via interpol. Corsou a pidi pa detencion di van der Pool pa motibo cu e ta wordo sospecha di traficacion illicito di arma, municion y explosivos.

De Pool, cu ta riba lista di hende mas busca, tabata na Venezuela y kier a pasa frontera pa drenta Colombia. Sinembargo momento cu e la purba cruza, durante control di inmigracion na Paraguachon, e oficialnan a reconoce van der Pool. E sistema di imigracion a alerta nan riba e orden di aresto di Interpol. Unabes cu nan a verifica e informacion di su pasaporte den e sistema nacional di biahero, y a confirma e alerta di interpol, e autoridadnan colombiano a pone van der Pool na disposicion di polis nacional pa su hudicialisacion. No ta conoci con lihe e lo por keda extradita pa Corsou. Su famianan mientrastanto for di diadomingo a confirma e detencion riba rednan social.Foto de Pool, cortesia KK curacao.