Piedra Plat tambe ta haya rotonde prome cu fin di aña

PIEDRA PLAT - Piedra Plat lo haya su mini rotonde prome cu fin di aña. Asina oficial di DOW Francis Gomez hunto cu minister di turismo Otmar Oduber a anuncia diahuebs mainta. E intencion ta pa cuminsa cu e trabounan na september proximo y caba cune posiblemente prome cu fin di aña. 

PAKICO TPEF 

E motibo cu ta minister Oduber ta profila esaki ta debi cu e fondonan pa e rotonde (y hunto cune e ultimo fase di paradera corridor) ta bin completamente di e TPEF esta Tourism Product Enhancement Fund. Splicacion ta cu esaki ta un di e areanan mas frecuenta tambe pa turista pa dirigi nan mes pa e sitionan turistico riba nos isla. Y aki ta unda e actual T-kruising tambe ta un problema. No solamente pa e fluho di trafico ora di uso turistico pero pa localnan den oranan crucial di dia. 

ULTIMO FASE

E ultimo fase di e corridor lo keda cla na mei di otro aña y ta parti den dos etapa.E prome lo cuminsa na e cruzada prome cu Bright Bakery bay ariba y lo yega net pariba di e veld di Britannia.E di dos fase cu lo cuminsa otro aña mes, lo yega te na Santa Rosa. Lo bay tin un fietspad panort di caminda y looppad y mata berde na ambos banda.