Kooyman: Nos ta dispuesto pa sinta bek na mesa pa resolve impasse

ORANJESTAD - Kooyman ta dispuesto pa sigui papia, pero e continuacion pa un combersacion tin cu bin di parti di FTA. E  gerente di e compania, Frank Heitkonig a bisa cu e operacion ta sigui normal, aunke cu tin tardansa y ta un poco fastioso. "E no ta duna nos e publicidad riba cual nos ta sinta warda" Heitkonig a sigui bisa. "Nos no a pidi pa e welga, nan ta para pafo. Mi no sa con largo e ta dura" e gerente a bisa. "Nos a bisa di cuminsamento cu Kooyman ainda ta dispuesto pa bolbe na mesa. Nos no a pidi pa para e combersacionan". "Tanten cu e (Rudy Geerman di FTA) no ta dispuesto pa papia cu nos, esaki lo no sigui" e gerente ta bisa. Esaki ta crea un impasse y e gerente ta spera cu tin un solucion pronto. "Nos no ta descarta nada" Heitkonig a bisa riba e posibilidad pa Kooyman acerca e sindicato atrobe. 

SITUACION FINANCIERO

Pa loke ta e parti financiero cu Kooyman a mustra cu nan formula presenta no ta nada nobo y a funciona semper cu Kooyman. "E 2.5% cu nos ta paga average den aumento pa aña, ta basa riba prestacion y historia. Esey nos a duna ultimo añanan na aumento. Y tin trahado cu abase di nan evaluacion ta ricibi menos aumento pero tin cu ta haya mas aumento. E 2.5% ta simplemente un average" Heitkonig a bisa. E situacion di mercado na Aruba actualmente no ta duna mas, segun e gerente. "No por duna mas, mientras cu tin un pakete di beneficio secundario asina bon". Riba e posibilidad di pone mas awa den biña pa logra algo toch extra, Heitkonig no kier a elabora ariba. "Nos ta dispuesto pa papia cu nan riba esaki".