Impasse entre grupo di taxista y minister riba MB ta sigui

ORANJESTAD - Un grupo di taxista ainda disgusta, a reuni diaranson mainta unda cu e lidernan di algun bond di taxi a splica e situacion actual pa evita confusion. A sali for di e reunion cu e taxistanan aki, compara cu un grupo otro cu si ta ok cu e cambionan introduci, no ta di acuerdo cu un parti di e respectivo MB. Ta trata di e articulo 2 di e MB cu supuestamente ta kita derecho den caso di un overschrijving. Segun Linda Orman cu a papia na nomber di e grupo di taxista aki, e MB ta te hasta kita derecho di un famia. Algo cu no por. "Taxistanan lo no permiti pa keda sin e derecho ey di e articulo 15 lid 1. 

REACCION MINISTER ODUBER

Minister di transporte Otmar Oduber a reacciona na NoticiaCla.com y mustra cu e loke cu e taxistanan aki ta haciendo, ta politica orchestra ya cu nada di loke nan ta papiando ta cuadra. De hecho, segun e mandatario, e contenido di e MB presenta, ta mescos cu e landsverordening y cu nada no ta cambia. E Landsverordening ta bisa exactamente mescos pero a bin cu e MB pa entre otro evita cu ta haci negoshi ", Oduber a bisa. Mirando e desaroyo di e ultimo aña(nan), a haya ta necesario pa bin cu e maneho y 'highlight' esaki pa medio di e MB pa accentua e parti di e ley di Landsverordening. Pero cu de hecho, nada no a cambia y cu e mandatario no a haya podernan nobo manera cu un grupo di taxista ta pretende.