Geerman: Lo haci accion na Kooyman mas fuerte si mester

ORANJESTAD - Si compania ta kere cu e ta laga e trahadonan sinti cu por para pafo y laga (e compania) sangra, e ora nos por haci e accion poco mas fuerte. Esey ta pensamento di Rudy Geerman di FTA cu ta esun encarga cu e negociacion pa e CAO. E sistema di evaluacion pa dicidi un aumento di Kooyman no ta funciona. Esey ta e motibo cu e trahadonan di Kooyman for di diaranson ta para pafo. Diaranson mainta ainda e trahadonan tabata para pafo pasobra no a 'haya invitacion' di gerencia pa sigui negosha. E impasse ta afecta gran parti di e compania unda cu por lo menos 60 trahado miembro di cual 95%  ta den accion. Den oranan di merdia cos a acelera unda cu a compronde cu a hasta blokea entrada di e lugar, pa medio di auto. E minimo cu tin cu sosode pa e trahadonan reanuda trabou, ta pa sinta na mesa cu e gerencia di Kooyman y yega na un acuerdo. Ultimo biaha cu a sinta na mesa, tabata diamars 2'or.