Baby Lunah mester di ayudo pa chekeo na Merca

ORANJESTAD - Baby Lunah ta bek den noticia. Un baby cu segun estadistica no mester ta na bida mas, ta bibito 6 luna caba danki na esfuerso increibel di su mayornan y mediconan cu no a entrega. Despues di a sigui su odisea inicial, a lag'e keto pa e recupera mas ainda. Pero awor ta necesario pa genera atencion pa un ayudo atrobe. NoticiaCla.com for di principio a sostene e causa aki. E meta primordial y mas crucial ta pa Lunah yega cerca un grupo di specialistanan, na tempo, pa asina e por probecha di cada oportunidad cu e tin. Esaki ta tuma lugar otro luna. 

KEN TA BABY LUNAH

Pa esnan cu no conoce Baby Lunah, nos ta repasa su momentonan.  Baby Lunah, un milager cu a nace dia 3 di december di 2015! Un milager, paso segun literatura e no ta suppose di ta akinan cu nos, bibo! Lunah a wordo diagnostica cu Trisomy18 ora e tawatin 3 siman y tin un (A)VSD (buraco grandi den su curason) y hypertension pulmonar, y cu tur cos ta mustra cu lo mester di un operacion pa coregi esaki. "Nos a wordo bisa cu door di su syndroom niun dokter lo opera Lunah. Pero buscando mas oportunidadnan pa nos Lunah, nos a haña specialistanan experiencia den trata muchanan cu e syndroom cu ta cla pa evalua Lunah pa engrandece Lunah su chancenan pa un bida mas largo y comfortabel" su mayornan a bisa.

PROBECHA DI OPORTUNIDADNAN

Na e momentonan aki Lunah ta creciendo y su salud general ta bon. Pero nos no por warda pa su curason y pulmonnan cuminza faya pa e ora core actua, paso e ora ta laat. Lunah tin oportunidadnan, Lunah a demostra cu e tin un deseo grandi di biba! E la cabi haci 6 luna y nos lo duna tur cu tin pa wak su wowonan yen di bida sigui briya y su personalidad bibito sigui logra hopi mas pa hopi tempo mas. Nos meta primordial y mas crucial ta pa Lunah yega cerca e specialistanan aki, na tempo, pa asina e por probecha di cada oportunidad cu e tin.

CONFERENCIA IMPORTANTE 

Na unda y ki dia? E conferencianan aki lo tuma luga na Merca cuminsando 10 juli, y nan ta wordo duna door di 2 di e organisacion di mas renombra y principal, cu a haci e muchanan cu un problema cu chromosome nan focus, y caminda Lunah ta registra caba: The Chromosome 18 Registry & Research Society, y SOFT US. Na e conferencianan aki e specialistanan ta topa hunto 1 biaha pa aña y ta evalua e muchanan aki pornada, duna informacion recien y asisti mayornan, famianan y cuidadornan cu tur lo necesario pa un miho cuido pa e muchanan special aki.

GASTONAN AIR AMBULANCE 

Door di Lunah su problema di curason y hypertension pulmonar nos a wordo conseha pa uza un air ambulance pa transport'e. E vuelo ida y buelta ARUBA-MIAMI-ARUBA so ta yega un suma di $45mil, y esey ta esun di mas barata. "Lunah ta un milagro, segun e estadisticanan, solamente 9-18% di e muchanan aki cu Trisomie18 ta bibo cu 6 luna. Lunah tin su chancenan, Lunah kier biba...yuda nos pa Lunah yega! E ta sigui surpasa y contradici estadisticanan! Lunah merece tur chance, e ta un luz den nos famia! Yuda nos den e lucha pa un chance pa bida, pa e luz di Lunah....yud'e for di bo curason pa esun di dje!" e famia a sigui bisa. Por yuda riba su go fund me campaign:   www.gofundme.com/babylunah . Of riba e cuentanan aki tur es tempo cu e To The Moon and Back Foundation ta wordo formalisa, segun informe, e siman aki. Cuenta bancario temporario ta: Aruba Bank  # 2357900190 - Liandha Garcia RABOBANK # NL72RABO0302144544 - J. Rijksen