Wever: Desicion di Marisol Lopez Tromp tabata di spera

STA. CRUZ – “E decision di sra Lopez-Tromp tabata di spera, pasobra ningun hende muher lo acepta tur locual cu e mester a tolera den e partido AVP”, lider di MEP Evelyn Wever-Croes a duna di conoce como prome reaccion riba retiro di Lopez Tromp for di partido. "Sra. Marisol Lopez-Tromp a duna di conoce cu Mike Eman no a atende cu e asunto di agresion den Parlamento. Esey nos ta custuma cu ne di Eman, pasobra Mike Eman ta conoci cu ta scohe pa nunca enfrenta problemanan. E ta scohe pa biaha pa representa Hulanda rond di hente rmundo, basta e no ta na Aruba pa atende cu problemanan di nos pais, y ni di su partido".  Segun Wever, Mike Eman ta lubida cu pueblo no a eligi’e como lider pa hunga di “loopjongen” pa Hulanda, sino pa goberna nos pais. "Mike Eman a bolbe faya, pasobra atrobe e ta duna balor na tur otro cos, menos na abuso contra hende muher. Marisol Lopez-Tromp a bisa cu den partido AVP ela wordo maltrata na tur forma, maltrato verbal, hopi insulto y palabra malo, y maltrato fisico. Ningun di e abusonan aki Mike Eman a atende cu ne", Wever ta bisa

DECLARACION DI JEFFREY KELLY

Segun Wever, locual a hala su atencion ta e declaracion di Jeffrey Kelly despues di e conferencia di prensa di sra. Lopez-Tromp. Lo e tabata tin mas credibilidad si ela duna su declaracion mesora ora e incidente a tuma lugar, y no warda pa sra. Lopez-Tromp papia, pa despues e papia."Mi a respeta su decision di no papia riba e topico aki tanten cu e caso ta bou di investigacion, pero e ora dicon ela core papia awe? Ta di lamenta con Mike Eman ta pone presion riba hende pa haci su trabou sushi p’e, pero no ta cambia nada na e situacion pasobra Jeffrey Kelly ta admiti cu sr. Dammers a agredi sra. Lopez-Tromp, y sra. Lopez-Tromp a menciona mas abuso cu e y su casa mester pasa den e partido y nos tur por a wak esaki" Wever a bisa.

ETAPA NOBO 

Segun lider di e partido geel, nos a drenta un etapa nobo awor, un etapa cu AVP tin 12 asiento so den Parlamento. "Di parti di nos fraccion, mi por segura un y tur cu nos lo sigui lucha contra e mal gobierno di Mike Eman. Nos ta poco mas cerca awor di e momento cu solo ta sali pa nos tur” segun Evelyn Wever-Croes.