Herde ta desmenti cu a papia cu prensa Hulandes contra Lopez Tromp

ORANJESTAD - "Mi ta lamenta sumamente e desicion sorpresivo di presidente di parlamento, colega di partido  Marisol Lopez Tromp". Mescos cu lider di partido AVP, e lider di fraccion Rene Herde a expresa palabra di sorpresa riba e noticia repentino di Lopez pa bandona partido AVP y declara su mes independiente. "Niun momento mi a spera esaki sosode" Herde a sigui bisa, splicando cu e no tin ningun problema cu Lopez. 

DECLARACION NA PRENSA HULANDES

Herde mesora a desmenti un di e declaracionan di Lopez cu e (Herde) lo a duna entrevistanan comprometedor na prensa Hulandes durante su estadia recien na Hulanda. "Mi no a duna ningun declaracion den ningun prensa Hulandes. Ningun" Herde a sigura prensa di Aruba diamars. El a admiti si cu durante su estadia el a duna entrevista na medio local si. "NoticiaCla y Amigoe a jamami na prome instante como cu mi no tabata na Aruba. A puntrami ki mi ta haya di e incidente y mi a bisa bon cla cu mi ta haye un incidente serio, inaceptabel y ta lamenta cu pa colmo e ta entre dos miembro di mesun fraccion dimi" Herde a sigui bisa. 

PARLAMENTARIONAN MESTER SACA NAN CONCLUSION

Mientras cu Herde a ripiti varios di e declaracionan haci anteriormente, el a sigura tambe cu contrario na declaracion di Lopez, cu no a yud'e ora cu a pasa den problema, AVP a combersa y sigur no a lague den scuridad. "Tur dia durante reunion di IPKO mi a aserke pa nos a sinta" E ta desmenti tambe cu e lo a tuma parti pa un of otro miembro. "Absolutamente, ningun condena ningun huicio, ningun critica di trek ningun partido. Alcontrario" Herde a bisa y a sigui pa cita NoticiaCla.com como fuente unda cu el a haci cierto declaracionan. "Den combersacion cu NoticiaCla di Aruba mi a bisa cu mi ta kere cu tur dos tin cu saca nan conclusion pa loke ta e seriedad di e incidente" Herde a bisa.  Y cu conclusion, Herde kier men cu ambos mester retira di nan funcion como vice presidente y presidente di parlamento. Esaki pasobra a duna nan a confiansa pa e funcion pero awor ta nota cu nan no a actua di lo mas corecto pa cu e funcion. "Mi no a husga, mi no ta husga, y mi no ta den posicion pa huzga".