FTA: Trahadonan ta sigui rabia y accion Kooyman ta sigui

ORANJESTAD - Despues cu diamars trahadonan a pone trabou abou na Kooyman, intencion ta pa sigui cu e accion atrobe diaranson.                  " Negociacion di CAO a pega y mayan accion ta sigui" presidente di sindicato FTA Hubert Dirksz a bisa NoticiaCla.com diamars atardi. E loke a pone e trahadonan pone trabou abou diamars, ta pasobra nan a nenga e proposicion di compania riba e parti salarial di nan CAO.             "Awor mester trata pa bai mesa bek. Pero compania mester bin cu mihor proposicion" e lider sindical a bisa. 

SUGERENCIA DI COMPANIA

Segun e presidente di sindicato, awendia e companianan kier mara tur beneficio na productividad y evaluacion. Nan kier flexibilidad y duna 0 aumento.  " E argumento ta cu cos ta malo y costo di bida no a subi  ultimo añanan". E lider sindical ta mustra cu e kier aumento fiho mas halto pasobra nan (FTA) no tin confianza riba evaluacion. E proposicion di Kooyman pa e CAO pa loke ta trata e parti di salario, no ta e loke cu e trahadonan y sindicato kier. E proposicion di Kooyman, -segun documentonan cu NoticiaCla.com a pone man ariba- , ta mustra cu ta sugeri un pago di un lumpsum di 750 florin entrante 1 di april 2016, pero despues aumento solamente basa riba prestacion den porcentahe. Ta mustra cu si presta segun norma regular, esaki ta traduci den aumento di salario. FTA ta considera esaki subhetivo. " E evaluacion ta ABCD cu ta igual cu 6-4-2-1% D ta minimo. Pero door cu salarionan no ta halto e no ta mucho". Di otro banda di parti di FTA, a sugeri pa entrante 1 di april 2016 (retroactivo) paga tur trahado miembro di sindicato un suma di 750 florin, y aumenta cada aña cu un suma di 35 florin (1/4) na 2017 y 2018. Kooyman sinembargo a rechasa esaki. Esey tabata motibo suficiente pa e trahadonan rabia y bandona pia di trabou. " E negociacion ta dificil" Dirksz a admiti. Y e ta spera cu diaranson cos bay miho. Mientrastanto accionan lo continua.