Monaliesa Kuwas ta kere den inocencia di su casa Elvis “Monster” Kuwas

WILLEMSTAD – Bibando un bida mas trankil na Hulanda, Monaliesa Kuwas ta spera cu e caso Magnus keda cla pa caba pa asina su casa, Elvis Kuwas, -conoci den pueblo como ‘Monster-, haya su libertad. Elvis Kuwas ta sera como un di e sospechosonan principal, acusa di a tira politico Helmin Wiels mata, y tin un castigo di bida largo den prison colgando riba su cabes. Den un entrevista exclusivo cu NoticiaCla, e casa, esta Monaliesa Kuwas, ta papia di su bida nobo na Hulanda, su relacion cu su casa Elvis, e caso Magnus, y mas. Un señora, cu segun su propio palabranan, ta kere den inocencia di su casa y cu ni maske su casa sali liber, lo no kier bolbe Corsou mas. Un entrevista cu bo ta lesa solamente riba NoticiaCla.

KEN TA MONALIESA KUWAS

Monaliesa Kuwas (28) te cu 2013 tabata biba na Corsou cu su casa Elvis y su tres yiunan. Pa Monaliesa, su famia ta prome cos den bida. “Mi ta respeta tur hende, y cierto caminda esei no pasa ta paso mi a duna loke mi a haña . Mi ta un persona cu ta cla pa yuda tur tur hende te caminda mi forsa permiti . Monaliesa no ta un angel , pero mi no ta hasi niun hende dolor” e ta cuminsa na bisa.

DIA DI TIROTEO

Riba dia di e tiroteo di politico Helmin Wiels, Monaliesa ta conta NoticiaCla unda e tabata ora cu e tiroteo a tuma lugar. “Mi tabata riba Brion Plein cu un amiga dimi cu nos yiunan. E muchanan tabata hungando riba Brionplein” Monaliesa ta cuminsa conta.

” Nos tabata sinta ta papia, (ora) un meneer cu ta sinta un tiki banda di nos, su telefoon a ring. E meneer a coi e telefoon. Nos a tend’e bisa ' hallo, kico ??? Nan a mate?? Imposibel!!’ Ami cu mi amiga a bira wak otro y mi di ta ken nan a mata cu e homber a reacciona”. Un rato despues, nan a haya sa e contesta. “ Asina e meneer a sera e telefoon, el a bira bisa un otro meneer banda di dje ' Nan a mata Helmin Wiel!!!”. Segun Monaliesa, nan mes a keda sorprendi “ Mi di cu mi amiga stoi nek! Asina mi a haña sa di e asesinato di meneer Wiels”, e ta sigui conta NoticiaCla.

 E NOMBER ‘MONSTER”

Despues di e tiroteo, investigacion a cuminsa y dado momento a pone man riba casa di Monaliesa, esta Elvis. Un homber cu den pueblo tin e apodo di “Monster”. Monaliesa mes no sa pakico nan ta yama su casa Monster. “E nomber monster ei mi no sa di unda el a bini . Semper nos a yama mi casa ‘Cho’ y tin biaha Kuwa “

 MONALISA DETENI

Fuera di Monster, of ‘Cho’ manera su casa ta yame, e mes tambe a cay sera brevemente y posiblemente relaciona cu e caso aki. Algo cu su casa, Elvis, a papia ariba tambe e siman cu a pasa y cu recherche posiblemente a presiona Elvis Kuwas pa papia bou di presion, cu su casa deteni. E detencion di Monaliesa mes tabata un sorpresa pe, aunke breve. Pasobra un dia despues tur cos a ‘make sense’.

“Mi a wordu detene na airport (na Corsou). Asina ma caba di pasa e control di tas cu tin na entrada, mi a haña par di recherche para einan ta smile warda mi yega serca” e ta sigui conta. “Ora ma yega, nan a bisa mi cu mi ta detene pa complice di asesinato di Lionel Arnaud, ma keda hari nan paso mi di ta kik e hende nan aki ta kwe riba mi”. Y esey no tabata tur segun e ta sigui conta. “ Ora douane a bai cumi pa controla mi maleta nan a haña mi cu droga . Pero e siguiente dia cu mi tabata detene, mi a bin compronde dicon nan a detene mi. Ta declaracion di Suhaima Rombley cu tabatin tin relacion cu mi casa, y e mes muhe cu recherche nan a mustra mi su potret cu mi casa a ganja riba mi. I pa awor aki e ta spoorloos. Straño no???”. E detencion di Monaliesa riba su mes a cambia su bida pasobra diripiente su bida no tabata sigur mas na Corsou. “Mi a bin biba na Hulanda pa motibo cu despues cu mi a sali sera mi bida tabata core peliger y pesei mi mester a bin Hulanda. Pero mi no ta bai masha den e detayes nan. “

SIGUI CASO MAGNUS FOR DI HULANDA

E caso grandi a tuma lugar siman pasa na Corsou, mientras cu Monaliesa mes tabata na Hulanda. Pues e mes no por a sigui e caso personalmente. Esey no ta kita afo cu e tin su pensamento riba e caso. “Wel pa ami no tabata un experencia dushi pa motibo cu mi casa ta wordu acusa den caso grandi y hopi serio y ami no por tabata por ta presente den corte “

PROCESO DI E CASO

Durante e siman, hopi tabata comenta si e caso tabata uno bon maneha, y tabatin disputa si e sospechosonan tabata hayando un huicio husto. De hecho, varios di nan a pidi hues riba e ultimo dia, pa por fabor percura pa nan haya un husticia husto. Monaliesa di su banda tabatin su pensamento riba e punto ey. Esta, si e caso tabata husto pa su casa of no. “Husto husto , ami mas mihor cu tur hende por bisa cu e no ta husto trata, sabiendo con e recherchenan a logra pa haña un cantidad di declaracion mescos y sabiendo di y manera nan a yega na mi casa. Dus pa ami e no ta husto, pero cada hende cu nan pensamento.” Y cu esey tambe, tin e pregunta obvio cu ta sigui. Como casa, y mirando tur loke nan a pasa aden (corda cu segun Elvis, a confronta e señora cu potretnan no corecto cu lo a pone e casa rabia y supuestamente declara contra dje), e pregunta ta si Monaliesa ta kere den inocencia di su casa. E tabata corto pero directo: “Si, ami si ta kere den mi casa su inocencia sigur sigur “

E siman cu a pasa, tabata uno cu a tene Corsou, Hulanda y Aruba den su gara completo. Cu un transmision radial nunca bisto, e la sigur laga un stempel atras den comunidad. Pa loke ta e contenido mes, tambe tabatin su comentarionan. Declaracionnan cu a wordo haci, cargonan treci dilanti y finalmente hasta un di e sospechosonan a haya su libertad temporal. Y pa e famia di Wiels, esey tabata un sla grandi. Pa Monaliesa mes, cu sa cu tin un castigo di bida largo colgando riba cabes di su casa, e caso tambe tabatin un nificacion.” E manera cu e cos nan ta bai aki esnan cu no ke ta den peliger mester tene nan mes pa no duna ni 1 depchi di opinion. Un cos ami kier ta pa e caso Magnus clara pa mi casa haña su libertad pa caba. I e opinion cu mi tin ta den e caso aki ta ora nos kere nos ta dal 1 stap kere cu nos ta yega serca, luga ta 50 mas atras nos ta bayendo y serando tanto hende . Cu podise nan tur ta inocente den e caso aki. Mi ta spera cu un dia e caso aki lo clara pero mi ta duda “

 KICO MONALIESA A SINJA DI E CASO AKI

Y tur hende a siña algo di e caso. Kico no haci, kico haci y mas importante, con pa hacie miho otro biaha? Monaliesa Kuwas tambe a siña algo. Algo cu pe, ta haci dolor. “Wel di e caso e cos di mas grandi cu mi a siña tabata cu tin hopi mentira y wega shushi ta tuma luga den nos husticia, con recherche nan ta hasi cos y desmenti cu nan no a hasi cos siendo cu ta berdad . I un fiscal cu no tabata presente momento di mi verhoor ta bin para dilanti corte bisa cu niun potret no a wordu mustra na mi persona. Mi kier un hende splica mi dicon mi tabatin un ganashi pa ganja e cos ei siendo cu mi no tabata sa cu mi casa tabatin relacion cu otro muhe, con mi por sa . E recherche a bisa mi cu mi casa tabatin relacion cu Monica Bergonje y Suhaima Rombley . Ami nunca no tabata sa. Awor cu bosonan a duna mi esei di conoce, bosonan ke bisa ta Monaliesa ta ganja . Husticia ta hasi cos desmenti. Ki voorbeeld bosnan ke duna e mundo di criminalidad aki fo ?. I loke ta trata di bida , mi a siña cu nunca nunca ni maske kico pasa, ni maske cuanto rabia mi tin, nunca mas lo mi lanta falso testimonio riba otro hende ni maske cuanto dolor el a hasi mi . Pasobra awor aki e dolor ta tripel biaha mas fuerte door cu ta ami tambe ta 1 di e persona nan cu a buta declaracion falso contra di mi mes casa”

KICO DESPUES DI CASO MAGNUS

Cu e caso tras di lomba, tin algun cos cu ta sigur. Tin un sentencia dia 29 di augustus proximo. Elvis Kuwas tin e sentencia mas pisa ta ward’e. Algo cu su casa ta hopi conciente di dje. Kico cu pasa y cua sentencia cu bin, un cos ta sigur. Bida di Monaliesa Kuwas ta cambia pa semper. “Wel pa mi ser eerlijk, dia e caso di asesinato aki a tuma luga el a shock mi un tiki si, pero e no a hasi efecto den mi bida paso ami ta un persona cu no ta preocupa ni mi no ta bemoei mi mes cu casonan politico pa e motibo cu eleccion ta pa bienestar di e politiconan. No nos votadonan. Esei ta ami su idea personal”.

CON BIDA DI MONALIESA TA AWO

Monaliesa ta splica NoticiaCla cu su bida awe, obviamente ta diferente. “Hopi hopi diferente. Hasta na momento cu mi casa a wordu detene, mi bida a sigui mescos . Ta duel mi cu e ta sera, pero ami tin den mi cabes cu mi casa mester haña libertad na un momento . Mi tabata sali cas trankil bai rond Corsou. Mi no tabatin miedo di net net nada. Y sabiendo cu mi casa ta inocente ta pio . No tabatin un pa kico di biba den niun ansha . Pero aworaki ta otro. Mi ta haña mi tin cu sinta un caminda pa warda e caso aki clara y tur berdad sali na cla pa tur hende mira e berdad, y con tur cos a bai pa ami cu mi famia tambe por biba trankil “

BIBA NA HULANDA

Pa awor, Monaliesa Kuwas ta biba na Hulanda. Un lugar cu no ta su lugar original. E pregunta ta e ora, cu si e oportunidad presenta, pa e bolbe Corsou, sea pasobra a laga su casa den libertad, of un otro motibo, si e lo bolbe. E contesta porta pa hopi, ta sorprendente. “Bibando aki nan e manera cu mi ta biba i e trankilidad cu mi tin aki , mi no ta kere cu lo mi bolbe Corsou ni maske cu e berdad sali na cla i un dia mi casa haña su libertad lo mi no bini”, Monaliesa Kuwas, ta finalisa bisando den su unico declaracion na prensa, den e caso aki, NoticiaCla. Foto: Cortesia Monaliesa Kuwas.