Tromp: Intervencion di CBCS den Giro Bank motibo pa campaña di difamacion

WILLEMSTAD - E intervencion di CBCS (Banco Central di Corsou y St Maarten) na GiroBank y e problemanan interno/controversia cu e hunta di comisario di CBCS ta e motibonan principal pa e campaña di difamacion contra e presidente di CBCS, Emsley Tromp. Asina Tromp mes ,-durante un conferencia di prensa-, a splica dialuna atardi na Corsou. Su presentacion awe tabata necesario segun e mes a splica, pa evita mas daño na CBCS y credibilidad di su persona. Mes momento e ta lamenta cu e no a haya e oportunidad aki pa haci'e den parlamento di Corsou unda cu e lo kier a duna su splicacion masha tempo caba. 

MOTIBO PA CAMPAÑA DI DIFAMACION

Manera ta conoci, a base di señalnan cu CBCS a bini ta ricibí tocante funcionamento di GiroBank, CBCS a inicia un investigacion na GiroBank, cu a resulta den hayazgo di hopi irregularidad y cu a conduci na CBCS haciendo denuncia na ministerio publico. Tromp a bisa ku Giro tawata un “bari di keshi ku jen di djaka aden”.  Tromp a mustra cu CBCS tin indication fuerte cu esaki ta un di e motibonan ku ta splica e serie di articulonan cu a ser publica resientemente den e corant hulandes “Het FinancieeleDagblad” (FD). Tromp a mustra cu na momento ku CBCS a cuminsa cu su investigacionnan na GiroBank, un miembro di e ex-gerencia y alabes accionista di GiroBank a menasa cu si CBCS no para e investigacionnan aki, nan lo cuminsa ku un campanya di defamcion encontra di e presidente di CBCS

MAS INDICACION 

Un otro indicacion fuerte ku e president di CBCS a menciona como posibel origen di e campaña di difamacion ku nan a cuminsa  contra su persona, ta sinta den e controversia cu ta existi dentro di hunta di comisario di CBCS. Tromp a mustra cu aña pasa November e relacion entre DNB y CBCS tawata topico di disucion den conseho di ministro di Reino. Na momento cu gerencia di CBCS a aserca gerencia di DNB pa hanya aclaracion dicon DNB no a informa CBCS di su dudanan encuanto efectividad y intergridad di e supervicion di CBCS, gerencia di DNB a splica ku esaki ta debi cu un miembro di hunta di comisario di CBCS a cana rond hulanda ta sembra duda den integridad di e gerencia di CBCS. Motibo pa cual DNB  a recuri na nan gobierno pa aserca e gobierno an di Corsou y Sint Maarten pa atende funcionamento di e organonan di CBCS. DNB no tin problema cu e gerencia di CBCS sino e funcionamento entre e organonan di CBCS. 

VIOLACION GEHEIMHOUDINGSPLICHT

Tromp a sigui splica cu na momento cu gerencia di CBCS a tuma nota di e accionan di e miembro aki di e hunta cu posibelmente ta actua en violacion di su “geheimhoudingsplicht”, gerencia di CBCS a informe cu gerencia ta considerando pa hasi un denuncia na minsterio publica pa e infraction ku e miembro aki a comete. Desde e momento ey, e miembro no a asisti mas na reunion nan di CBCS y ta actualmente na hulanda caminda e ta residencia. Tromp a menciona tambe cu e miembro aki ta ex president di e partido politico na Hulanda D66 y ta un ex empleado di e ministerio BZK. E ta mustra cu den e articulo di FD nan a cita e miembro aki di hunta di comisario di CBCS ku a hasi un declaracion ku ta en pugna ku e acuerdo ku ta eksisti entre e organonan di CBCS ku lo no sigui procede mas den corte. 

MANEHO I TRACK RECORD DI E BANCO 

Tromp a sigui mustra cu experiencia rond mundo incluendo na Hulanda ta mustra ku supervision sin fallo ta casi imposibel. E ta referi na e crisis bancario mundial cu a kuminsa na Merca y despues (2008) a sigui na otro paisnan incluyendo Hulanda . Banda di esei tin diferente caso di bankonan individual ku a bai totalmente robez. Tromp a duna ehempel di varios cu a keda afecta manera  Lehman Bros, Washington Mutual, Countrywide Financial, Bear Stearns, etc) y na Hulanda (Texeira de Mattos, Tilburgse Hypotheekbank, DSB Bank. " Den tur dos pais tambe e estado Financial bailout mester a interveni y aporta pa salba diferente banco na Merca (Bank of America, CITI, AIG, Fannie Mae, Freddie Mac, etc) y na Hulanda (Westland Utrecht, Friesch Groningse I recien Aegon, SNS I ING) unda e critica di Financiel Dagblad a keda e tempo ei ?" Tromp a puntra. 

SUPERVISION PRUDENTE 

Segun e director di CBCS,  por bisa ku por conclui kun a contrario di eventonan mentiona na Merca y Hulanda, supervision prudente a zorg pa den e ultimo 30 anjanan na Antillias no tawatin un crisis financiero  den e sector of fallo di compania financiero individual. Tambe e ta laga sa ku den casonan di fayo di supervision na Hulanda nunka CBCS a cuestiona integridad y efectividad  di e supervisor Hulandes." Al contrario nan a hasi algo constructivo cu esey"

CUADRO DI MANEHO

Tromp a pinta un cuadro di maneho segun e, corecto di su banda, mustrando cu contrario na declaracionan haci for di media di Hulanda, ta net lo contrario a sosode. Su maneho segun Tromp mes a splica, tabata di tal forma cu e mes a incorpora cierto reglanan di supervision cu a evita cu cos por a bay malo. Y a sigura cu ora cu mester a actua, a actua segun regla. Pues repasando un sin fin di ehempel, Tromp kier a sigura cu e desconfiansa e incapacidad manera cu e la wordo pinta, ta lew di ta berdad. E asunto di Ennia el a toca brevemente, mirando cu e instituto en cuestion mes a defende su mes y no ta necesario pa haci tal. Y unda cu e tabata por, el a defende su causa. Esaki pasobra hopi di e acusacionan tambe, pa motibo di ta mara na ley di privacidad, Tromp no por a drenta den detayes eynan. Pero a siguro ku no tin niun motibo pa panico I ku tur kos ta na ordo. 

SITUACION PERSONAL

Tromp a toca tambe e acusacionan personal den su direccion. Entre nan su finanzas priva y propiedadnan cumpra den exterior. E articulo(nan) di FD ta haci mencion di esaki y como tal Tromp a haya ta bon pa aclarea esaki tambe. Riba su finanzas publico, Tromp a referi na dos rapport, uno di PWC y uno di ARC unda cu ambos a resulta den nada particular y cu no a haya nada irregular. Pa loke ta su dos apartamentonan, esakinan a keda financia segun regla y aki tambe no tabatin ningun irregularidad. Ta referi na dos apartamento cumpra na Miami, y pa cada compra Tromp a splica con esaki a bay. Biahenan pa Miami tambe a wordo scrutina, y aki tambe Tromp a duna su splicacion. Biahenan pa Miami tabata sea priva cu segun Tromp, e mes a financia, y esnan medico a wordo cubri pa su seguro medico.