OM: Marisol Lopez y Chris Dammers bou investigacion di Landsrecherche

ORANJESTAD - Mientras cu hopi ta kere cu e caso a 'muri' y cu tin indicacion cu cos ta 'business as usual', NoticiaCla.com a compronde e siman aki cu landsrecherche ta ketobay investigando e caso di dos parlamentario cu a haya problema cu otro tres siman pasa. Manera por corda despues cu tanto presidente di parlamento Marisol Lopez Tromp y vice presidente Chris Dammers a entrega keho contra otro luna pasa ora cu nan a haya 'problema cu otro', ministerio publico a confirma cu nan tur dos a haci aangifte. "Y nos a bisa cu ministerio publico ta bay wak e aangiftenan aki" vocero di ministerio publico Ann Angela a bisa NoticiaCla.com e tempo ey. Mientrastanto ministerio publico a wak nan y a dicidi pa pidi landsrecherche pa investiga. "Landsrecherche a cuminza un investigacion relaciona cu e aangiftenan haci" Angela a confirma na NoticiaCla.com e siman aki. Mes momento e ta indica cu   ora cu esaki ta cla, lo por dicidi kico ta haci cu e resultado di e investigacion. 

KEHO ENTREGA

Presidente di parlamento Marisol Lopez Tromp a entrega keho contra vice presidente di parlamento Chris Dammers dia di e incidente y Dammers a haci mescos. Den un declaracion na NoticiaCla.com, Lopez a bisa :" Chris a dal mi un mokete na mi cara/cachete ora cu m'a reclam'e cu e ta overschrijdt e placa di begroting pa dienstreizen, sin cu esaki tawata riba agenda of presupuesta". El a keda di duna un declaracion mas amplio despues di e entrega di e keho. Dammers no kier a reacciona ainda e momento ey ora cu NoticiaCla.com a puntr'e pa comentario. 

KICO A PASA

Manera cu NoticiaCla.com a raporta prome instante, tabata un situacion cu a bay for di man diaranson mainta 25 di mei ultimo den sala di parlamento ora cu segun informacion inicial cu NoticiaCla.com a ricibi, vice presidente di parlamento Chris Dammers lo a dal presidente di parlamento un bofta den su cara. Riba un video cu a wordo saca den parlamento, por mira y scucha con Lopez Tromp ta reclama Dammers den bos halto, mientras cu casa di Lopez Tromp (Edsel Lopez) a yega y a hala atencion fuertemente di Dammers. 

KICO A PASA

Segun un version cu NoticiaCla.com a haya despues, tabata mustra cu Dammers lo a pasa  Lopez Tromp un cant'i man, mientras cu e otro version ta cu Lopez lo a pusha Dammers un banda pa despues Dammers pas'e un wanta. E video sinembargo ta mustra con Lopez den bos halto ta reclama Dammers mientras cu ambos ta para meymey den sala di parlamento. Diripiente ta mira y tende casa di Lopez yega parlamento y reclamando Dammers den bos halto. Keda pendiente pa mas informacion.

BUSINESS AS USUAL

Mientrastanto tur dos persona ta trahando normalmente, y ta sigui nan rumbo. Contrario na casonan 'normal' ora cu posiblemente mester suspende esnan envolvi pendiente e investigacion, e caso aki ta diferente mirando e funcion cu e dos personanan aki ta carga di parlamentario. Reglanan aki ta conta diferente y como tal no por haci nada te ora cu e investigacion pa landsrecherche termina. Fotonan ta di archivo