Donantenan di sanger ta mire como un acto noble y bunita

ORANJESTAD - Ta donante di sanger ta un obra noble. Cu e donacion di bo sanger bo ta yuda salba bida, sea ta pa un baby cu a nace prematuro, un persona cu ta recuperando despues di un operacion, of pa un persona cu a perde hopi sanger durante di un accident. E persona cu duna sanger no sa ken a haya su sanger, pero un cos ta sigur, su sanger ta wordo poni na bon uzo den e proceso pa salba bida di un otro ser humano. Den cuadro di dia di donante di sanger, World Blood donor day, NoticiaCla.com. ta relata experiencia di algun donante di sanger. 

SHARINE HART

Sharine Hart su mama ta un donante di sanger, y den e periodo cu e tabata bishita hospital hopi pa ta cu un miembro di su famia cu tabata hopi malo, e tambe a bira interesa pa bira donante. El a cuminsa duna sanger na aña 2002 na Aruba. Ora el a bay studia el a bira donante na Hulanda tambe, y ora el a bolbe Aruba el a cuminsa duna sanger akinan atrobe. Hart ta conta cu e ta un experiencia bunita pa sa cu bo ta yuda un persona cu bo no ta conoce; hasta tin hende cu sa cu e ta un donante y ta bin gradici’e pa loke e ta haciendo. E ta consciente cu e ta yudando hende awo, pero cu por yega un dia cu e mester di sanger tambe.Sharine Hart ta encurasha tur hende cu ta den e posicion pa por duna sanger, pa no pens’e largo y tuma accion. Pensa cu bo ta yuda un hende, salba un bida ta mas importante, el a finalisa bisando. 

GIANCARLO CROES

Giancarlo Croes ta un donante di sanger, kende a dicidi algun aña pasa pa bira donante ora cu Stichting Bloedbank Aruba a acerca su dunado di trabao pa check si tin trahadonan cu lo por y ta interesa pa duna un contribucion na mundo di medicina pa medio di un donacion. Croes a bisa cu e tin e suerte di ta saludabel y por yuda Stichting Bloedbank Aruba pa yuda esunnan cu mester di sanger. E ta haya importante pa tin suficiente donante di sanger na Aruba, y pues a pasa e chekeo di salud y a bira donante na cuminsamento di 2014. E ta splica cu e experiencia na Stichting Bloedbank Aruba ta uno hopi positivo, unda cu e ta wordo trata semper na un forma amabel y nan ta pone sinti comodo.  Giancarlo Croes a expresa cu ta contento di por tin e oportunidad pa aporta, y ta haci un yamada na tur hende cu ta den e posicion pa duna nan contribucion di sanger pa salba bida.

PALABRA DI DANKI

Palabra di danki ta bay na cada persona cu a tuma nan tempo pa haci un trabou asina generoso cu ta duna bo sanger pa salba un bida. Sanger no ta algo cu por cumpra sino ta bay di un ser humano pa un otro. Esaki ta haci’e pues mas special. Si bo ta desea di bira donante por yama Stichting Bloedbank Aruba  pa un afspraak na 587 0002. Tambe por subi nos website pa lesa mas tocante donacion di sanger www.bloedbankaruba.aw of por bishita nos Facebookpage.