Kiwanis Club of Aruba ta lansa su siguiente gran proyecto comunitario: ‘Bikes Back 2 Life’

ORANJESTAD – Kiwanis Club of Aruba cu hopi orguyo y entusiasmo ta anuncia su siguiente proyecto comunitario. Ta trata di ‘BB2L’, un nomber cu ta para pa ‘Bikes Back 2 Life.’ Su obhetivo ta pa colecta rond e bicicletanan cu no ta den uso mas, drecha nan na e punto cu nan ta safe y despues regala nan bek na muchanan di menos recurso. 

E idea, presenta originalmente pa ex miembro y “Distinguished President” Dennis Ecury bek na 2013, semper a keda riba mesa y awo Kiwanis Club of Aruba ta asina leu di por bay ehecut’e. Intencion di e organisacion local ta pa realisa e accion aki diferente biaha pa aña, y enfoca riba muchanan entre 5 pa 15 aña den diferente bario. 

‘BB2L’ ta un proyecto masha bunita paso ta duna un bida nobo na un obheto cu ta trece hopi alegria na e mucha cu tin’e, pero tambe pasobra comunidad ta participa activamente. Kiwanis Club of Aruba ta haci un invitacion na un y tur pa cuminsa tira bista riba e bicicleta ey cu tin rond di cas, si ta haci uso di dje of e t’ey ta coy stof y frusto so. Si bo no tin un bicicleta mes na cas tambe bo por yuda dor di conta famia, amigo of bisiña di e proyecto aki pa wak si nan si por contribui. 

Na final, Kiwanis Club of Aruba ta busca pa tur hende ta contento. Donadornan lo ta contento di por a deshaci di e miho manera posibel di algo cu nan no ta uza mas; nos medio ambiente lo ta contento pasobra tin menos sushi pa atende cune; y esnan cu haya e bicicleta y nan famia lo ta contento pasobra nan tin un bicicleta bais ‘nobo’ pa goza di dje, ademas di ta activo na un manera sano y por ta, te hasta haya interes den un deporte nobo. 

‘Bikes Back 2 Life’ ta posibel danki na e valioso cooperacion di empresa local Tri Bike cu ta bay asisti Kiwanis Club of Aruba den e evaluacion, seleccion y reparacion di e bicicletanan cu por wordo renoba. Tri Bike tambe ta bay ta encarga di haci un inspeccion final di e bicicletanan pa declara nan safe pa subi caminda. For di awor caba Kiwanis Club of Aruba ta gradici gerencia y personal di Tri Bike pa acepta di forma parti di e proyecto aki. 

Personanan cu kier contribui cu e proyecto ‘BB2L’ door di duna nan bicicletanan cu no ta wordo usa mas por tuma contacto cu miembro di Kiwanis Club of Aruba Oslin Ismail na 592-6248. Di e manera aki ta coordina pa un persona bin busca e bicicleta of na unda por trec’e. E club ta ansioso di wak e generosidad di nos comunidad manifesta pa asina por haci hopi mucha contento. 

Kiwanis ta un organisashon global di voluntarionan dedica na cambia mundo via di un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informashon di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba.  Tambe por bishita e website di kiwanis Internacional na www.kiwanis.org.