FTA: Gerencia di Barcelo kier pidi bancarota di TMRG pa kita presion

ORANJESTAD - Gerencia di Barcelo (doño di Occidental Hotel) kier pidi bancarota di TMRG (e grupo operador anterior di Aura Casino) , pa e ora kita tur presion riba nan lomba y di e otro interesado. Asina presidente di sindicato FTA Hubert Dirksz a bisa NoticiaCla.com dialuna mainta. Problema ta cu si esey tuma lugar, e trahadornan lo sali perdi, pasobra nan relacion di trabou a termina y mester cuminsa full di nobo. "Mientrastanto nos ta spera cu gobierno lo trek in e licencia prome cu tur esaki tuma lugar, ya cu esaki ta un mal hecho". E speransa sinembrgo segun Dirksz ta cu partidonan por yega na un deal prome cu esey. 

MINISTER CLA PA REVOCA

Luna pasa mientras cu ainda reunionnan tabata andado pa logra un operador Canades pa e casino di Occidental Hotel, tabatin indicacion cu si no logra, gobierno lo revoca e permiso. Den combersacion cu minister di labor Paul Croes e tempo ey, el a confirma na NoticiaCla.com cu 'berdad si no yega na algo, nan lo mester trek e vergunning in'. Si esey sosode sinembargo, e ta e prerogativo y desicion di minister di husticia Arthur Dowers y no Croes. Mediado di gobierno tabata reuniendo cu tres partido, esta e operador, sindicato y tambe e doño di hotel, pero nada concreto no a sali afo. Mientrastanto sindicato FTA a manda carta pa minister Dowers pa revoca e permiso di e casino, segun e presidente di sindicato Hubert Dirksz a confirma na NoticiaCla.com. 

INTERVENCION DI MINISTER

"Ami ta haciendo mi esfuerso pa logra un operador, pero si e no logra no por keda alarga e proceso aki mas" Croes a admiti na NoticiaCla.com. E ta mustra cu el a haci un esfuerso tambe den paga e trahadornan e cessantia sin cu e compania a bay bancarota. "Esaki naturalmente cu apoyo di Mediador y SVb". Pa loke ta e deadline cu sindicato a pone pa keda cla, tin un diferencia di opinion. Mientras cu e sindicato (FTA) ta mustra cu e deadline tabata 30 di mei, e mandatario ta mustra cu e deadline a vence caba. "E 'deadline'  segun mi a pasa caba. Pero FTA tambe a haye prudente pa toch sigui purba haya un operador" Croes a bisa e tempo ey. Mes momento el a mustra cu declaracion cu Barcelo/Occidental mester a paga e trahadornan huridicamente no tin base. "Trahadornan tabatin un contrato cu Aura Casino, no cu e hotel" Croes a bisa finalmente. Negociacion ta wordo hiba cu representante di un grupo Canades. Foto cortesia www.bondia24.com