Participation agreement ta firma cu CITGO y e ta bay opera e refineria

ORANJESTAD - Citgo ta e compania cu a firma cu gobierno di Aruba y elo maneha e refineria di Aruba entrante 1 di augustus. Pero si gobierno Venezolano, incluyendo presidente Nicolas Maduro, kier bisa cu ta PDVSA ta maneha e refineria, ta keda na nan. Asina minister di energia Mike de Meza a bisa NoticiaCla.com dialuna mainta den un aclaracion. "Ora bo papia di e definitive participation agreement, esaki ta firma cu CITGO, caminda cu CITGO ta e compania cu ta bay opera e refineria, CITGO lo ta responsabel y para garant pa e refineria. CITGO lo haci inversionnan den e refineria" de Meza a sigui bisa. 

CONFUSION

E confusion a bin durante e transmision siman pasa diabierna ora cu durante e presentacion na television, presidente Venezolano tabata papia di PDVSA, y e nadador tabata papia di 5 refineria awor cu PDVSA tin, incluyendo na Aruba. Ademas dado momento a firma cu PDVSA y otro biaha cu CITGO, unda cu cierto momento tabata haci mencion di CITGO Petroleum mientras cu cierto relatonan tabata haci mencion di CITGO Aruba. 

RELACION CITGO Y PDVSA

"CITGO ta un dochter bedrijf di PDVSA. PDVSA na fin di dia ta un compania estatal. Si e presidente di Venezuela of cualkier minister kier papia di e refineria na Aruba, como si fuera e tabata e ta di PDVSA, e ta nan libertad pa haci esey. Si PDVSA kier papia di dje of CITGO kier papia di dje, huridicamente y factually ta CITGO ta bay opera e refineria" de Meza a bisa.