Vanessa Fernandez ta GM nobo di RIU Palace

ORANJESTAD - Riu Hotels & Resorts a anuncia cu Vanessa Fernandez a wordo apunta como Gerente General. Cu mas di un decada di experiencia, Fernandez ta responsabel pa tur operacion na e propiedad iconico situa banda di lama. Aunke cu e ta nobo riba e isla di Aruba, Vanessa Fernandez ta un parti di e famia di RIU Hotels & Resorts ya pa 10 aña, incluyendo su rol como un gerente asistente na Riu Palace Macao (Republica Dominicano) y Riu Cancun (Mexico), y director na tanto Riu Jalisco (Mexico) como Riu Negril (Jamaica). Awo, como Gerente General di Riu Palace Aruba, Fernandez lo comparti su rikesa di conocemento y experiencia di turismo cu e bunita isla di Aruba. Ademas di por papia Spaño y Ingles, Fernandez tambe ta domina e idiomanan di Portuges y Aleman, permitiendo e pa provee un experiencia excepcional na un variedad diverso di bishitantenan. Fernandez a gradua di e Universidad di Asturias cu un diploma den turismo, y a studia na e Universidad Catolico di Ávila na Spaña unda el a ricibi un diploma den Economia y Comercio tambe. Despues el a sigui cu su studio y a ricibi un Masters Degree den Quality Management.