Pontilius: Si no pura cu e deal, gobierno lo revoca permiso di casino

ORANJESTAD - Si no pura cu e deal pa trahadonan di ex Aura Casino, gobierno lo revoca e permiso y tur cos a caba. Esey ta e señal cu mediado di gobierno Anselmo Pontilius a haya caba y a confirma esaki na NoticiaCla.com. Mes momento, contrario na e pensamento cu nada no ta pasando, reunionnan ta tumando lugar entre e gruponan respectivo pa por logra e reapertura di e casino na Occidental. Asina Pontilius a sigura NoticiaCla.com. Tin abogadonan di FTA y e grupo den discusion, pasobra tin un discusion cu ta keda cu ta cantidad di trahado cu ta den touw, e salario cu mester wordo paga pa e lunanan cu no a traha, y e cantidad di trahado cu finalmente tin cu keda traha. 

CONVERTI PLACA DEN CUENTA DI SPAR

E conseho di mediado di gobierno tabata pa laga e trahadonan mes yuda cu e renobacion, y tambe pa no paga e trahadonan e 6 luna di placa sino want'e como un tipo di fondo di savings. "Reconoce e debe y convirti'e den un plan di spaar. Pero esunan cu no haya trabou, bo tin cu paga nan den un solo biaha" Pontilius a bisa. E deal aki a wordo atendi internamento y no ta conoci con a para cu esaki. 

REVOCA PERMISO DI CASINO

Mediado di gobierno kier pa trece e partidonan bek na mesa, pero no por obliga ningun hende tuma nada. "Pasobra e grupo tin su posicion y e sindicato tin su posicion. Nos como mediado ta bisa cu ta importante pa logra un reapertura pa hende haya trabou" Pontilius a bisa. Su pensamento tras di esaki ta pasobra mas esaki tarda, mas e chens ta cu gobierno por dicidi di revoca e permiso y esey a wordo trata caba internamente. "Si bo trek in e vergunning, tur speransa a caba e momento ey" Pontilius a bisa. Y e mediado di gobierno a confirma na NoticiaCla.com cu esey ta e señal cu ela haya caba.