Musiconan a conoce nan Asociacion di Musico y Artistanan Aruba AMAA

ORANJESTAD - Musiconan di Aruba den fin di siman a conoce cu loke ta bira AMAA (Asociacion di Musiconan y Artistanan di Aruba) y kico tur elo tin cu para p'e. Den un reunion presidi pa minister di cultura Otmar Oduber, a presenta e conseho di e asina yama 'triumviraat', cu ta un comision di tres pa cuater persona cu ta encarga cu un trabou specifico.  Segun e mandatario di cultura, e intencion ta pa cu e ehecucion di e rapport aki,  "percura pa e musiconan haya nan balor, mas ainda debi na e trabou duro cu cada un musico ta eherce den e mundo di awendia" . Loke tambe e asociacion mester trece ta e union cu ainda no t'ey entre e musiconan.  “Si nos kier vence, bira grandi y bira conoci, nos mester brasa otro. Nos mester manda un señal hopi cla na comunidad cu mester sostene nos musiconan. Nos musiconan mester por haya number 1, 2 y 3 riba e topnan di tur siman na Aruba pa di eynan nos por wordo reconoci internacionalmente". Tambe kier pa tin un maneho di labor pa cu proteccion di e musico como trahado, di asuntonan economico pa e proteccion di e produccion di e musiconan.