Ciclista accidenta ta culpa bond ciclistico di negligencia financiero

ORANJESTAD – Un ciclista cu recientemente a keda herida ora e la keda alcansa pa un auto, awor tin mas problema pa resolve. Ta resulta cu ,-contrario na pensamento-, e no tabata segura pa accidente di bicicleta, cu tur su consecuencianan. E ciclista, Zaida Everon, ta culpa Aruba Wielers Bond pa neglicencia door di no a paga e seguro manera cu mester tabata. Tur e tempo, Everon si tabata paga seguro na e bond. Segun Everon, tur ciclista cu ta desea, por afilia nan mes via un team pa bira miembro di Aruba Wieler Bond. Un di e bentahanan di un miembrecia ta entre otro di tin e siguransa y e beneficio di un seguro durante practica di e deporte.

Ta resulta cu desde februari 2014, e seguro aki cu ta cubri cierto gastonan den caso di desgracia, mester a wordo renoba dor di Aruba Wieler Bond. “Niun dia Aruba Wieler Bond a atende su miembronan riba e importancia di pago di miembrecia pa garantisa e validez di nan seguro” Everon ta bisa. “Asina mes ami y varios otro miembro a hasi nan pago debidamente pa por tin e trankilidad di por conta cu un seguro y ta sali di e punto di bista cu ta e responsabilidad di e federacion pa percura cu tur cos ta na ordo” e ciclista herida ta sigui bisa.

E ciclista ta mustra cu mientras cu e bond a publica su calender di competencia nacional y a wordo atendi pa e compania di seguro cu mester renoba e polisa, Aruba Wieler Bond a keda negligente. Everon ta cuestiona cu e bond a acepta placa, sin cumpli cu su deber financiero di paga e seguro. Y tur e tempo e miembronan ta core nan caredanan auspicia bou di e bond, sin cu tin seguro.

Everon ta considera esaki un blunder, y no ta prome biaha cu nan no ta cumpli. Problema cu cumplimento pa cu nan jaarrekening, subsidio, y otro asuntonan a pone cu nan ta den problema. Tur esaki, siendo cu e bond ta uno di e poconan cu a ricibi un kwart miyon florin na 2013 sin cu nan a responsabilisa nan mes pa esaki. Everon ta cuestiona su pago di miembrecia y kico e bond a haci cu e placa. NoticiaCla no a haya e banda di medaya di Aruba Wieler Bond y ta spera di tin esaki dialuna. Fotonan di Everon ta mustra con e la keda despues di e accidente.