Aduana ta inaugura sistema digital di pago

ORANJESTAD - Diabierna atardi Minister di Finanzas, Angel Bermudez conhuntamente cu director di aduana, Ricky Croes a duna inicio na e digitalisacion di pago ora ta haci aangifte via sistema di Asycuda.

Segun e mandatario, cu colaboracion di algun banco local, departamento di aduana a instala un sistema digital p'asina ora un cliente haci su pago via banco, esaki ta drenta automaticamente den e sistema di aduana. 

Di e forma aki e proceso pa por haya "vrijmaking" ta acelera, mientras cu na mes momento ta limita e riesgonan cu placa efectivo y cheque ta trece cu ne. "Asina cu e sistema ta den operacion, e clientenan no tin mester di para den rij cu nan documentonan pa paga, pero por haci 'aangifte' y pago fo'i nan propio oficina", e mandatario a informa. Pues e ta un adelanto y paso grandi pa loke ta actualisacion y modernisacion di departamento di Bermudez a declara cu e ta sigui traha pa aumenta e eficiencia pa cu e proceduranan di aduana y principalmente pa mehora e servicio cu e departamento aki ta duna nos comunidad.