ENNIA: Ta lamenta publicacion eroneo di Financieel Dagblad

WILLEMSTAD - Ennia ta lamenta e publicacion di articulo di Financieel Dagblad (FD) cu ta indica cu e compania di seguro a wordo laga sin placa. Asina e compania di seguro ta reacciona como declaracion oficial riba nan website. "E articulo ta basa riba un rapport confidencial di Banco (Central) di Hulanda di juni 2015. E (articulo) ta trata e topico (di) "inversionnan" cual a wordo discuti mas biaha caba, y ta basa riba contenido saca for di contexto. Ademas ta wordo menciona algun punto cu no ta berdad. Entre otro e loke ta wordo bisa riba p.e. Mullet Bay de hecho ta eroneo", e compania ta cuminsa bisa. 

"ENNIA ta un compania di seguro profesional cu ya ta estableci pa 68 aña na Antiyas. Desde e toma di Delta Lloyd pa e grupo Ansary na 2005, e capital propio a aumenta di 31.5 miyon na 2005 te na casi 269 na 2015. E activa total a aumenta di ANG 909 miyon na 2005 pa ANG 2 biyon na fin di 2015, y e disposicion obligatorio cu mester wordo manteni pa garantisa e interes di e doñonan di polisa (di seguro) a aumenta di ANG 790 miyon na 2005 te ANG 1,7 biyon na 2015".  Ademas e compania ta sigui bisa cu "Desde e crisis di 2008, e reglanan internacionalmente, en particular e normanan di solvencia, na cual banco, aseguronan y otro institutonan financiero mester cumpli cune, a wordo mas scrutina. Esey ta e caso tambe na Corsou y Bonaire unda cu CBCS (Banco Central di Corsou y St Maarten) ta eherce e supervision di Banco (Central) di Hulanda. ENNIA semper a traha hopi di serca cu varios supervisor, pa sigura cu ENNIA ta tene su mes cu ley y regla. Den cuadro di esaki nos ta convenci cu e interes di tur doño di polisa ta mas cu protehi y lo keda asina tambe". Te aki e declaracion oficial di ENNIA. Por lesa e declaracion original aki.