Ralph Palm: Noticia di Financieel Dagblad riba ENNIA ta absurdo

WILLEMSTAD /ORANJESTAD- Den un reaccion por escrito pa e corant Hulandes cu a publica e noticia di e situacion precario di e compania di seguro Ennia esta Financieel Dagblad, e director di e compania Ralph Palm a mustra cu e storia aki ta un absurdo, y cu den e 10 añanan cu Ansary a cumpra ENNIA, e balor di ENNIA a subi cu 700% y cu entradanan a subi 33 biaha y e reservanan a subi cu 80%. Asina Palm ta mustra cu e loke a sali publica, no ta cuadra. 

E NOTICIA

Manera cu NoticiaCla.com a raporta, reproduciendo e informacion riba e asunto di Ennia cu lo a wordo financieramente laga seco practicamente pa su propio doño, e comerciante Irani-Mericano Hushang Ansary, a crea hopi reaccion local y internacional. E informacion inicial di entre otro financieel Dagblad -, ta raporta awe mainta cu e noticia negativo lo a sali for di un raport secreto di Banco Central di Hulanda (DNB) cu Het Financieel Dagblad a haya den su poder. E documento ingles ta data di juni 2015. 

UZA RESERVA PA METANAN PROPIO

Aki ta resulta cu Ennia e ultimo añanan a uza sigur tres kwart di su reserva na dos acuerdo dudoso cu e doño Ansary segun e corant Hulandes ta raporta. Por lo menos 570 miyon euro lo a wordo saca for di Ennia pa inverti den otro negoshinan di Ansary. Ta trata di un tipo di negoshi vest-broekzak, esta saca di un caminda y hinca den otro caminda den e mesun compania, osea e doño no ta perde nada. Asina e ganashi ta keda den e companianan di e doño mes.

POLISA DI SEGURO NA PELIGER

Loke ta mas peligroso, ta cu for di e rapport di DNB por lo menos 10 mil persona cu tin polisa di seguro, no tin garantia cu nan seguro tin fondo y cu nan no a wordo poni na altura. Loke ta mas pio ainda ta cu, -segun e rapport-, tur esaki lo a sosode bou di supervision di Banco Central di Hulanda y di Corsou y St Maarten. Asina Financieel Dagblad ta skirbi. Fuentenan ta menciona cu e directiva di DNB lo a wordo alerta caba di e practica aki. Ta apenas 4 aña despues e banco a dicidi di inicia un investigacion, pasobra no tin un autoridad 'formal' pa haci tal. Banco Central di Hulanda awor ta cuestiona integridad di colega banco esta CBCS (Banco Central di Corsou y St Maarten). Segun FD aparentemente tin asina un desastre na CBCS cu DNB a pidi extra autoridad y a haya esaki tambe pa actua contra CBCS.

REACCION FINANCIERO

Reaccion mesora cu NoticiaCla.com a ricibi for di e mundo financiero ta cu ta bisa cu ta remarcabel si ku FD no ta menciona cu bou di supervision di DNB un crisis bancario financiero a tuma lugar na Hulanda y cu na Antiyas bou di supervision di e mesun CBCS nan no a pasa den e crisis ey y tin un clima financiero hopi solido compara cu Hulanda.  

SEGURO NA ARUBA NA PELIGER?

Manera ta conoci, algun aña pasa gobierno a pasa un ley cu ta obliga tur compania pa cera un pensioen pa nan trahadonan. Nan por a haci esaki cerca sea Ennia of Guardian/Fatum. Awe mainta varios instancia a acerca NoticiaCla.com cu e pregunta cu si nan placa ta sigur of no y kico esaki ta nifica pa nan pensioen aki na Aruba. Y si Banco Central di Aruba ta na altura di esaki y con bin nan no a actua. A tuma contacto cu e instancianan concerni pero te na momento di e raportahe aki, ningun di e instancianan a raporta bek ainda.