Varios preso di KIA realoca temporalmente na wardanan di polis

ORANJESTAD - Despues di e disturbio na KIA e siman aki, un grupo selecta di preso a wordo traslada pa varios warda di polis pendiente e situacion di e areanan afecta pa e disturbio. Asina director nobo Rocco Tjon a confirma na NoticiaCla.com e siman aki. Pa loke ta e dañonan registra, e candela a daña varios cel y algun hala di e edificio. Pero e suma exacto ta dificil pa duna. Esey pasobra inspectie mester a pasa ainda na e sitio pa por a haci e investigacion necesario. 

MIEDO PA MAS PROBLEMA

E situacion for di dia cu e problemanan a sosode, ta normal atrobe. Despues di e disturbio, concientemente a opta pa continua cu e programa manera cu e ta, esta cu bishitanan pa preso a continua normal un dia despues. "Como parti di e draaiboek di KIA, nos tin tur cos in place si mester bin disturbio atrobe, nos por actua mesora den un forma profesional" Tjon a sigui bisa. 

PRESONAN REALOCA TEMPORAL

Mirando cu tabatin cierto areanan afecta, mester a realoca e presonan. Un cantidad di preso a wordo realoca den e respectivo celnan na varios warda reparti riba nos isla. "Na e momento cu e situacion na KIA permiti esey atrobe, nan lo bin bek na KIA" Tjon a bisa. No kier a bisa concientemente, pa motibo di seguridad, kico e cantidad di preso ta cu a wordo ubica na e varios wardanan. "Na tur warda di polis e seguridad ta garantisa (unda) cu tin algun preso cera". Y como cu no a surpasa e capacidad di e celnan na e otro wardanan di polis, no tabatin problema extra di seguridad. "Intern polis lo sa con pa atende cu esaki", e director a sigui bisa.  

NECESARIO PA AYUDO EXTERNO?

Como parti di e draaiboek, ta hinca den dje cu por pidi asistencia di afo p.e. militarnan, aunke den e caso aki no tabata necesario. A gradici e personal di KIA pa nan inzet, unda cu Tjon a mustra tambe cu e cuidadonan di preso mes a risca nan bida cierto momento pa yuda trece orden. E biaha aki, no tabata necesario pa busca ayudo externo aunke ta cla pa cualkier cos, nan por pidi ayudo na gruponan 'externo'. 

PROME SIMAN DI TRABOU

Mirando cu ta e prome siman di trabou di e director nobo, el a splica cu concientemente ela tuma e tempo pa siña conoce e personal bon, scucha nan, tende kico e dolornan ta y kico e retonan ta. Hunto nan lo bay determina e maneho nobo di e prison.