Delegacion di Aruba rumbo pa Caracas pa firma acuerdo cu CITGO

ORANJESTAD - Manera cu NoticiaCla.com a raporta como primicia, awe mainta un delegacion di Aruba a subi avion rumbo pa Caracas Venezuela pa ta presente na e firmamento di e acuerdo entre gobierno di Aruba y CITGO Petrolium pa reapertura di e refineria. Cu e delegacion a bay un grupo di prensa selecta pa cubri esaki. Riba e potret por mira e delegacion di prensa cu a subi avion priva awe mainta. 

E NOTICIA

Tabata algun dia pasa cu NoticiaCla.com a raporta e fecha pa firmamento di e acuerdo entre CITGO y gobierno di Aruba y cu esaki tabata poni pa diabierna awor. A raporta riba esaki unda cu tabata tratando pa keda cla pa por firma diabierna. E motibo pa cual ta firma na Venezuela, ta mas probabel pasobra CITGO ta keda un compania subsidiario di PDVSA cu ta un compania estatal Venezolano. Ademas NoticiaCla.com tin confirma cu gobierno di Aruba a invita tres emisora di Aruba pa cubri e evento aki. E lugar y orario di e evento ainda ta keda pendiente. 

DEAL ANUNCIA

Tabata diabierna 13 di mei ultimo cu gobierno di Aruba y Citgo a anuncia cu nan a yega na un acuerdo satisfactorio y asina por a finalisa e negociacion pa e 'definite Participation Agreement'. Partidonan a yega na un acuerdo riba e terminonan comercial y legal pa e rehabilitacion di e facilidad (refineria) na Aruba. Mientras cu falta pa firma e documentonan final ainda, partidonan ta di acuerdo riba tur punto. Detayenan legal y operacional lo a keda anuncia despues. Segun minister Mike de Meza entrante 1 di augustus caba lo cuminsa cu e rehabilitacion di e refineria y ta spera cu den cuestion di 2 aña e refineria lo ta completamente operacional.

KICO POR SPERA

Den cuadro cu e politica di gobierno su pensamento di sostenibilidad, e refineria lo wordo converti den un facilidad capabel pa utilisa gas natural como su fuente di energia principal y asina limita emisionnan. E facilidad lo procesa petrolio crudo y/ of upgrade petrolio crudo extra pisa den un capacidad nominal general di 209MBPD. Citgo lo drenta den un lease agreement di 15 aña cu un opcion pa extende pa 10 aña. 

FIRMA ANYTIME

Despues no a tende nada mas y a cuestiona e tardansa. Riba esey e mandatario di energia a bisa despues cu e acuerdo entre Citgo y Aruba lo ta cla pa firma anytime. Cu e declaracion aki den fin di siman cu a pasa, minister di energia Mike de Meza kier a trankilisa e incertitud e dianan aki cu 'no a firma nada ainda'. Por lo menos esey ta e percepcion. Segun un comunicado emiti pa gobierno den fin di siman, durante fin di siman e delegacion di Aruba, encabesa pa minister Mike de Meza, a regresa sumamente satisfecho despues di a sostene reunionan intensivo cu e ekipo negociador di CITGO na Miami. Durante su estadia den exterior, Minister Mike de Meza a reuni cu Dr. Nelson Martinez, Presidente y CEO di CITGO Petroleum Corporation. “Hunto nos a fiha e plan di accion di awor te cu dia di firmamento,” Minister Mike de Meza a declara. “Esaki lo por sosode anytime,” segun e mandatario. Foto Cortesia Hilario Doncker.