Kool & the Gang, Izaline Calister y Levi Silvani den Caribbean Sea Jazz Festival

ORANJESTAD - Kool & the Gang, Izaline Calister y Levi Silvani ta algun di e artistanan line-up up pa e di 10 edicion di  Caribbean Sea Jazz Festival. E line up a keda presenta e siman aki durante un conferencia di prensa.      

Diabierna 23 di September Caribbean Sea Jazz Festival lo presenta:

New Cool Collective Ft. Matt Bianco, Kool & The Gang, Tony Succar’s Latin Show, Ivan Neville’s Dumpstaphunk y tambe Serghio Jansen. 

Y riba diasabra 24 di september lo presenta:  Unity ft. Jon Secada, Izaline Calister, Franky Janga, Levi Silvani & Rabdal Coson y Carlos Bislip.

Sr. Carlos Bislip di “Scol Di Musica” a anuncia durante e conferencia di prensa cu nan lo bin cu un banda special di studiantenan. Y mas cu claro nan ta cla pa trece ambiente pa e publico di Aruba y mustra con talentoso nos hobenan local ta.

Hunto na e conferencia tambe tabata presente algun di sponsernan y mas cu claro sin nan e festival aki no lo ta posibel. Un danki special ta bay : ATA, AAA, InselAir, Divi Resorts, Renaissance Hotel y Chill. 

Sr. Benson di “ATA” a splica cu ATA ta completamenta tras di Caribbean Sea Jazz Festival y ta contento pa celebra hunto cu nan e di 10 aniversario y ta spera pa sigui traha 10 aña pa progreso di e Festival. E festival tur aña ta atrae un cantidad grandi di bishitantenan, tanto di nos islanan cerca den Caribe, pero tambe turistanan di Merca, Europa y latino America. 

Sra. Edalitza Weller di “Renaissance Hotel” a infatisa cu e aña aki ta di 4 aña consecutivo cu Renaissance Hotel lo ta e cas di Caribbean Sea Jazz festival 2016 y lo bay transforma completamente un biaha mas pa asina ofrece un ambiente hopi anima pa tur e bishitantenan di Caribbean Sea Jazz Festival 2016.  “Nos ta contento cu un biaha mas Caribbean Sea Jazz Festival lo ta cerca nos na Renaissance Festival Plaza. “ tabata palabranan di Sra. Weller. 

Sra. Michiko Takatsu di “Curators on the GO” a splica cu ya caba nan a cuminsa di tuma contacto cu e artistanan pa participa durante e exposicion di arte den cual lo tuma lugar den e Ballroom di Renaissance durante e dos dianan di e festival. Bishitantenan por pasa y aprecia e diferente tipo di artenan y tambe por participa den un “silent auction” pa asina por bay cas cu algun di e obranan di arte spectacular cu lo ser presenta. Y door cu Caribbean Sea Jazz festival ta celebrando su di 10 aniversario nan a bin cu un T-shirt contest unda nan ta invita tur artista, designer y tur cu ta interesa pa bin cu un diseño nobo pa e T-shirt oficial di Caribbean Sea Jazz 2016. Por entrega un diseño nobo te cu 1 di Augustus y e ganador lo wordo anuncia den luna di September. E ganador lo ricibi AWG 500,- y entrada pa e festival. Pa mas informacion tocante e T-shirt contest bishita www.caribbeanseajazz.com 

Caribbean Sea Jazz Festival 2016 lo ta bay ta durante e weekend di 23 y 24 di September. Un invitacion special ta bay pa e pueblo di Aruba probecha y cumpra carchi na prijs special di Early Bird pa solamente $40,- y ta obtenibel na Superfood y tambe riba nos website official www.caribbeanseajazz.com. E oferta ta valido te cu fin di luna di Juni.