Rebeldia cu candela na KIA a continua brevemente diaranson anochi

SANTA PATIA - Problema di disturbio na KIA a continua diaranson anochi. E biaha aki presonan a opta pa cende algun cel den e seccion di hubentud na candela. Di parti di vocero di polis Lito Lacle a confirma esaki na NoticiaCla.com diaranson anochi y a bisa mesora si cu e candela a wordo controla mesora. "Mando policial hunto cu OM (ministerio publico) a dicidi cu tur hende envolvi cu e caso aki, esta cu ta participe den esaki lo wordo deteni pa 'brandstichting y poging tot doodslag' cu tin un castigo di por lo menos 15 aña riba dje" Lacle a finalisa bisando. No ta conoci cuanto persona tabata envolvi den e caso di awe nochi. 

E PROME MELDING DEN DIA

Manera tabata conoci for di mainta, e prome raportahe tabata cu un disturbio na KIA mainta a pone cu autoridad a mobilisa tur unidad   pa purba establece orden atrobe eynan. Mientras cu informacionan no tabata mucho cla, a compronde cu a consecuencia di un razzia cu a tuma lugar marduga, prezonan a protesta mainta cu cendemento di varios parti di e prizon na candela. E problemanan a cuminsa for di mas of menos 9'or di mainta y mesora a manda tur unidad pa e sitio, incluyendo minister di husticia Arthur Dowers cu a bay pa pone su mes na altura. Mas den mainta a bira conoci cu e rebeldia na e prizon KIA a termina y polis tabatin e situacion bou di control atrobe.  

RAZZIA 

Despues detaye di e origen di e problema a bira conoci. Segun e relato oficial di polis, tabata alrededor di 3’or y mey di marduga diaranson varios team di Cuerpo Policial, hunto cu personal di KIA a tene un accion di listramento y control den tur cel na Korrektie Instituut Aruba (KIA), unda cu a haya celular, “steekwapens” (arma blanco) y otro materialnan prohibi. Tur e obhetonan y materialnan aki a keda tuma den beslag. Vocero di cuerpo policial, Lito Lacle ta splica cu di parti di polis a participa miembronan di e teamnan di K9, Riot Team y Mobiele Eenheid, y tur cel a wordo listra.

CANDELA HUIS VAN BEWARING

Algun ora despues di e accion, banda di 8:50 di mainta, Cuerpo Policial a ricibi e melding cu celnan den KIA ta na candela den e “Huis van Bewaring” (HVB). Lacle ta bisa cu ta pensa cu e candela den e celnan ta un reaccion di e detenidonan relaciona na e accion cu a tuma luga. E compleho di celnan di Huis van Bewaring ta parti den cuater parti, esta A, B, C, y D, Lacle ta splica, y den e bloknan A1, B2 y D2 e celnan completo a keda afecta, y den D1 solamente e matrasnan a wordo kima. Tabatin mas of menos 15 persona herida, incluyendo cuidadonan y detenido. Un persona a keda transporta pa IMSan pa ricibi tratamento pa heridanan cu el a ricibi durante di e disturbio. E otro heridonan a wordo trata pa e dokter di KIA mes.