Cruz Cora ta confirma cu tin pobreza serio na Aruba

ORANJESTAD - Cu tin pobreza na Aruba, Cruz Cora por confirma. Nan ta atende diariamente cu problema di pobreza na Aruba. De hecho, segun e director Michel La Haye, gran parti di nan trabou diario awe ta pa combati esaki awo. "E ta algo cu hopi hende no sa y no ta wak"   La Haye, ta confirma na NoticiaCla.com. Tur dia hende ta acudi na e oficina di e organisacion na Dakota, pidiendo pa sea cuminda of mester di paña. Ademas si pa cualkier motibo bo mester keda pafo, Cruz Cora ta ofrece tambe un shelter temporal. Esaki den caso di p.e. ora un cas kima completamente y laga e famia desampara den un rato. 

ASISTI CU PAKETE DI CUMINDA Y PAÑA

Segun La Haye, danki na e paketenan di cuminda cu nan tin, y awor te hasta un 'tienda' di paña barata, nan por yuda combati esnan den necesidad. "Y hasta si bo no tin placa, nos lo por yudabo cu un pakete di cuminda" La Haye ta sigui bisa. Mes momento, La Haye ta sigura cu Cruz Cora ta un instancia di emergencia, pues unabes cu e ta bira un problema structural, ta dirigi e personanan na e instancianan concerni pa cada asunto. P.e. si mester di cuminda tur dia, esey no ta e meta di Cruz Cora. 

PETICION TA TUR DIA

Loke ta hala atencion ta cu ta tur dia tin otro hende ta bin pidi sea cuminda of paña na Cruz Cora. "Tur dia nos tin hende. Tur dia. Un te dos peticion pa dia. Nan ta local, tur edad, tur dia". Nan ta hendenan di varios genero, y cu tin diferente tipo di problema. Pero La Haye ta confirma cu e problema di pobreza na Aruba ta grandi. Mientras cu e peticion pa cuminda ta grandi, e parti di paña tambe ta creciendo awor cu e 'charity bazaar' tambe ta birando mas popular. 

FUNDRAISING PARTY

Un forma cu hendenan por yuda Cruz Cora Aruba, ta pa cumpra un of mas carchi di nan fiesta anual di recauda fondo, cu ta dia 17 di juni proximo. Of pa transferi placa riba e cuenta di Cruz Cora via nan cuenta di Aruba Bank 14.15.629. Un otro forma ta pa bira boluntario di Cruz Cora Aruba, y asina e persona por haci un diferencia y esey na fin di dia, ta e cos mas importante.