KIA: Situacion a normalisa atrobe despues di rebeldia

SANTA PATIA - E rebeldia na e prizon KIA a termina y polis tin e situacion bou di control atrobe. Manera cu NoticiaCla.com a raporta inicialmente un rebeldia na KIA a crea un chaos chikito cu a rekeri atencion di autoridad pa pone orden liher atrobe. Tur esaki consecuencia di un razzia mas prome riba propiedad di e presonan y e celnan bishita.

RAZZIA 

Segun e relato oficial di polis, tabata alrededor di 3’or y mey di marduga diaranson varios team di Cuerpo Policial, hunto cu personal di KIA a tene un accion di listramento y control den tur cel na Korrektie Instituut Aruba (KIA), unda cu a haya celular, “steekwapens” (arma blanco) y otro materialnan prohibi. Tur e obhetonan y materialnan aki a keda tuma den beslag. Vocero di cuerpo policial, Lito Lacle ta splica cu di parti di polis a participa miembronan di e teamnan di K9, Riot Team y Mobiele Eenheid, y tur cel a wordo listra.

CANDELA HUIS VAN BEWARING

Algun ora despues di e accion, banda di 8:50 di mainta, Cuerpo Policial a ricibi e melding cu celnan den KIA ta na candela den e “Huis van Bewaring” (HVB). Lacle ta bisa cu ta pensa cu e candela den e celnan ta un reaccion di e detenidonan relaciona na e accion cu a tuma luga. E compleho di celnan di Huis van Bewaring ta parti den cuater parti, esta A, B, C, y D, Lacle ta splica, y den e bloknan A1, B2 y D2 e celnan completo a keda afecta, y den D1 solamente e matrasnan a wordo kima. Tabatin mas of menos 15 persona herida, incluyendo cuidadonan y detenido. Un persona a keda transporta pa IMSan pa ricibi tratamento pa heridanan cu el a ricibi durante di e disturbio. E otro heridonan a wordo trata pa e dokter di KIA mes.

FASE DI EVALUACION

Na momento cu e vocero a haci su prome declaracionnan na prensa, e situacion tabata den fase di evaluacion di kico e resultadonan tabata, y kico ta e siguiente pasonan cu lo mester tuma. A sigui un reunion organisa pa e team encarga cu maneho di disturbio den KIA. E detenidonan entretanto tabata sea den e area unda cu nan ta “lucht” bou di vigilancia of cera den otro luganan y celnan di tal manera cu tin control riba nan.