KPA ta confirma detencion di un polis pa maltrato di polis femenino

ORANJESTAD - Alto mando di polis diamars atardi a confirma detencion di un polis pa maltrato di polis femenino. Esaki relaciona cu un keho oficial entrega den su contra y pa garantisa integridad di e investigacion y di henter e Cuerpo di Polis. E procedura aki ta normal, den cuadro di por garantisa un investigacion imparcial. Separa di e investigacion penal, a tuma medidanan disciplinario tambe.

INTEGRIDAD

Mando Policial a mustra den pasado y ta para riba cu e integridad di nos Cuerpo Policial ta masha importante, no solamente pa e esfuerso continuo pa mehora e servicio na comunidad, pero tambe e bon nomber internacional cu nos ta goza di dje.

E CASO

E caso a sosode den fin di siman na un warda di polis unda cu e polis homber lo a agredi e polis femenino, debi na un caso di jaloezie. Informacion cu NoticiaCla.com tin, ta cu nan tabata pareha di otro, y algo a bay robes. E polis femenino a move bay otro warda pa haci denuncia contra su colega.