RHD Community kier minister rectifica MB riba taxista sino ta bay corte

ORANJESTAD - Fundacion RHD (Right Hand Driver) Community Aruba lo manda un carta oficial pa minister Otmar Oduber, dunando e oportunidad pa rectifica e MB (ministeriele beschikking) riba taxistanan cu ta impugna na tratadonan Europeo. Aki ta referi na e MB cu ta inclui entre otro pa tin taxistanan cu stuurwiel na man drechi. Segun su presidente Cristian Soto Garcia, si esaki no pasa den e tempo cu lo stipula den e carta, no lo keda e fundacion nada otro cu entama un caso contra di e Minister pa no respeta e verdragnan mane stipula den nos Constitucion.

DECLARACION DI MINISTER

Fundacion RHD Community Aruba a tuma nota di declaracionnan haci recien pa Minister Otmar Oduber, tocante un Ministeriële Beschikking cu ta prohibi vehiculonan Right Hand Drive (RHD) di por opera mane transporte publico. E excuus uza pa Minister Oduber ta cu esaki lo trece bida di otro persona (turista) den peliger ya cu den pensamento di Minister, Aruba su trafico no ta designa pa e tipo di vehiculonan aki. Riba e tema aki, Fundacion RHD Community Aruba lo ta hopi corto y no tin e intencion di bay den un discusion ya cu tanto verdragnan Europeo, rapportnan di Comision Europeo y sentencia den corte Europeo ta papia cla.

PERCEPCION ERONEO

Segun Soto Garcia, e percepcion eroneo cu vehiculonan RHD no a wordo designa pa e trafico di Aruba ta mustra claramente cu e minister no tin conocemento di e tema ya cu historia data di aña 1700 padilanti ta splica e motibo dicon nos tin e trafico mane cu e ta awe. "Gran parti tin di haber cu colonisacion y revolucion, pero cu tempo a bira custumber, pues no tin nada di haci cu 'safety'. Rapportnan extenso cu a wordo traha pa Comision Europeo a base di trafico hopi mas pisa ta mustra duidelijk cu e posicion di e stuur no tin ningun influencia y incidentenan ta refleha e comportacion di e manehador, no di e stuur" Soto Garcia ta sigui bisa. E ta sigui mustra cu e mesun comision Europeo a gana caso den corte Europeo contra Paisnan Polonia y Lithuania pa haci cosnan similar cu Minister Oduber ta haciendo, faltando respet na tratadonan vigente. " Pa ultimo kier a haci’e duidelijk cu pa mas cu 2 aña caba tin vehiculonan RHD ta funciona mane transporte publico y esaki nunca a trece ningun persona den peliger y/of a causa un incidente" Soto Garcia a bisa finalmente.