Tui Fly lo denuncia pasahero histerico riba buelo di diasabra

KRALENDIJK -TUI FLY ta bay haci denuncia contra e dama histerico a bordo di e buelo diasabra pa Aruba y Bonaire. Asina Persbureau Curacao ta raporta. Manera cu NoticiaCla.com a raporta tambe den fin di siman, e capitan di e buelo a dicidi di haci un aterisahe di emergencia na Azores, pa autoridad por a baha e muher for di e avion. Durante e buelo, e muher histerico tabata grita cu elo a rementa e avion pa medio di un bom. 

TRIPULACION ILEGAL

E buelo unabez na Azores mester a keda posponi debi cu e tripulacion a bira 'ilegal' Esey ta e termino cu ta uza ora cu un tripulacion surpasa nan ora maximo di trabou di regulacion. Mester a ubica e 300 pasaheronan den hotelnan riba e isla. 

TESTIMONIO DI PASAHERO DI ARUBA

NoticiaCla.com a haya testimonio di un pasahero cu ta biba na Aruba y a experencia tur cos. "Fuera di e gritamento (di e muher) mi no a mira mucho of scucha mucho" e pasahero di Aruba a bisa NoticiaCla.com for di Azores. "E muher a duna e impresion di no tabata psycologicamente ok. Pero henter e episodio a sosode patras den avion y ami tabata sinta mas dilanti" e persona a sigui bisa.  

COBRA PASAHERO E DAÑONAN

TUI FLY awor ta bay cobra e pasahero 'histerico' e gastonan cu e buelo a incuri extra. E avion mientrastanto a yega Aruba y Bonaire diadomingo, un dia despues di tabata planea. 

Cu colaboracion di Persbureau Curacao. Foto cortesia Persbureau Curacao.