Entrante augustus chens di awacero ta aumenta pa Aruba

ORANJESTAD - Den luna di augustus Aruba por spera un aumento di awacero, compara cu normal danki na e fenomeno di La Niña, aunke e no lo ta mucho fuerte. Asina meteorologo Marc Oduber a splica NoticiaCla.com. Como tal a premira cu e proximo lunanan for di augustus e promedio di awacero lo ta mas cu normal. "Algo bon mirando e periodo seco cu nos a experencia" Oduber a bisa. Tur ta efecto tambe di un caida di e efecto di El Niño, cu ta nifica cu e lama den parti Pacifico ta mas cayente cu normal, y La Niña ta net contrario, y esey nos ta mirando aworaki. Oduber ta premira cu lo tin un aumento di entre 20 pa 40% mas awa cu normal. E no ta nifica cu e awa lo ta tur dia sino algun dia cu hopi yobida y otro dianan cu menos awacero. 

TEMPORADA DI HORCAN

Pa loke ta e temporada di horcan, ta parce segun Oduber cu enberdad ta bay tin mas actividad ciclonico pa 2016 den lama Atlantico. Interesante ta e hecho cu Merca su pronostico ta mas cauteloso cu otro regionnan, mirando cu nan tin miedo di e actividad di lama Atlantico. Mirando e situacion actual, esey ta splica e aumento den cantidad di tormenta pa 2016. 

SITUACION PA  ARUBA

Mientras cu ta dificil pa bisa si Aruba lo haya bishita cerca di e tormentanan eventual, Oduber ta mustra cu mirando e condicion atlantico unda cu e zona di convergencia tropical di Caribe por ta tiki mas panort, e ora bo ta bisa cu bo ta tiki mas cauteloso si bo haya un ciclon cu ta 'keiro' un tiki mas zuid. Pero esey tin cu mira cada luna segun e temporada ta cambia. Mirando e estadistica, tin 12% chens cu un ciclon por pasa dentro di un 100 miya nautico di Aruba, esey ta aumenta un 16% aworaki. E no ta zona mucho, pero mester ta prepara tur aña pa cualkier eventualidad. Si e ta un aña keto of no, ata bo tin mala suerte y net e aña cu cos ta keto, uno a forma y pasa riba bo y bo a keda mes leu cu si tabata un aña activo cu cantidad di tormenta pero tur a pasa leu di Aruba. 

CANTIDAD DI TORMENTA

Pa 2016 ta anticipa total di 17 tormenta tropical, 9 horcan di cual 4 intenso den lama Atlantico.