‘Diferente medaya pa Aruba’

PUERTO MONTT - E scol Shocokan Karate-Do Aruba a ricibi e grato noticia cu e alumno Alejandro A Gonzalez Lujan a gana medaya di plata den e ‘Seminario Internacional y Torneo Open Karate Deportivo’ na Universidad Austral de Chile, sede Puerto Montt, den e categoria ‘kata’ (tecnica di un combate imaginario). E torneo aki a tuma luga dianan 3, 4 y 5 di juni 2016. Tambe Alejandro A Gonzalez Lujan a sa di duna un bon presentacion y a gana medaya di plata den categoria ‘kumite’ (combate/bringamento). 

Otro noticia placentero ta cu na mes momento a participa tambe na e torneo nos instructor Lucio Gonzalez Lujan den e categoria ‘kata y kumite senior’. Den ambos categoria el a destaca, posicionando su mes cu medaya di oro pa ‘kata senior’ y medaya di brons pa ‘kumite senior’. 

Awe Shocokan Karate-Do Aruba ta contento y ta extende un palabra di pabien na su medayistanan. Pronto e karatekanan lo t'ey bek na Aruba. Nan lo comparti tur loke nan a siña cu nan compañeronan ya cu ambos karateka a sigui diferente seminario duna door di e campeonnan mundial, esta Luca Valdesi (Italia) y Douglas Brose (Brasil). Un danki na tur esnan cu a apoya nos karatekanan. E truinfo aki ta di boso tambe!