Wever: Permiso nobo pa e molinanan na Urirama ta contra ley

STA. CRUZ – Recientemente tabatin caso atrobe den corte pa trata e ley di molina di biento, e asina yama hindervergunning. Segun lider di MEP Evelyn Wever-Croes su relato via un comunicado, lo tarda hopi tempo prome cu e caso aki keda cla. "Un biaha mas e obheccionnan a wordo atendi pa e comision di LAR. Contra e decision di LAR partidonan por bai corte den prome instancia, y despues ainda apela. Pues por tarda sigur dos aña ainda. Lider di MEP ta un di esnan cu ta hibando e lucha contra e molinanan.

PERMISO NA 2015

Na october 2015 gobierno a bolbe duna windpark Urirama un permiso nobo pa e molinanan. Habitantenan a bolbe manda carta di obheccion, y nan a wordo scucha dos siman pasa pa e comision di obheccion di LAR (bezwaar advies commissie LAR). E permiso aki ta contra e ley di ROP (Ruimtelijke Ordening Plan), e mesun ley cu habitantenan di Malmok a uza contra e hotel den nan bario. E ley di ROP nunca a wordo cambia, y e ley ey ta prohibi molinanan di biento na Urirama.

PERMISO CONTRA PRINCIPIO

Aparte di esey e permiso ta contra principionan di bon gobernacion tambe pasobra no a tene suficiente cuenta cu interesnan di e habitantenan. Habitantenan tin un interes principal cu ta e riesgo cu e molinanan por causa na salud di nan yiunan y nan mes. Gobierno ta mustra un terkedad di no kier haci un “Health Impact Study”. Departamento di Salud Publico a pidi gobierno placa pa por haci e studio ey, pero gobierno no kier haci'e. Gobierno ta referi na otro estudionan tocante medio ambiente, y kier uza esey pa salud. Sinembargo e otro estudionan ey no ta specialisa riba salud.

INTERES GENERAL MAS IMPORTANTE

Gobierno ta di opinion cu e interes general ta mas importante, y e interes general ta pa na aña 2020 logra yega 100% energia alternativo na Aruba.  P'esey gobierno ta insisti pa bin cu e molinanan y ta pidi e habitantenan pa sacrifica salud di nan yiunan y di nan mes. "Si gobierno kier pa habitantenan sacrifica nan yiunan, por lo menos gobierno por laga haci un studio riba e efectonan riba salud manera debe ser. Esey ta locual habitantenan ta pidi. Dicon gobierno no por considera esey?" Wever ta puntra. 

VISION 2020 TA IREALISTICO

Ademas, e vision 2020 ey ta un vision totalmente irealistico segun Wever, y no ta alcansabel. Segun e lider di e partido geel, cu un simpel reken som di scol basico bo por prueba esey. "Na 2009 danki na e molinanan na Vader Piet di gobierno di MEP Aruba a logra yega na 22% di energia alternativo. Kico gobierno di Mike Eman a haci? Den 7 aña di gobierno, apesar di gasta miyones y miyones na su vision green, Mike Eman a logra apenas 3% adicional energia alternativo cu e panelnan solar na airport. Pues awor Aruba ta para na 25%. Falta apenas 4 aña pa 2020, bo ta kere realmente cu e pais cu Mike Eman a manda bancarota, por bay di 25% pa 100% den apenas 4 aña, y sin placa? Si den 7 aña nan a traha 3%, den 4 aña nan por traha 75%? E contesta ta: no" Wever a sigui splica. P'esey segun Wever, e vision 2020 di Mike Eman ta un vision irealistico. Pues no ta husto pa pidi habitantenan pa sacrifica nan salud y di nan yiunan, pa un vision irealistico! Gobierno ta dispuesto pa sacrifica e area sagrado di kapel di Alto Vista, y destrui e paz na nos kapel. Ademas kier sacrifica tambe e area di naturalesa. Y dicon? Pa un vision totalmente irealistico!

DESEO NO TA UN VISION

“No ta pasobra prome minister Mike Eman a bisa cu esey ta su deseo, esey mester ta un vision. Nos no mester kere tur locual Mike Eman ta bisa. Mike Eman tin un tendencia serio di gaña. No lubida cu dos aña pasa ela yama tur Hulandes pa abusador sexual, y nos tur sa cu esey tampoco ta berdad”, lider di MEP Evelyn Wever-Croes a finalisa bisando.