Unico hotel cu 1500 camber ta esun banda di aeropuerto

ORANJESTAD - E unico hotel cu minister di turismo ta na altura di dje cu tin 1500 camber, ta esun banda di aeropuerto. E mandatario no a specifica si ta trata di e hotel cu ta bira e asina yama 'airport hotel' si. Segun e mandatario banda di esaki den futuro no tin ningun 'toezegging', ningun compromiso, ningun permiso duna. E discusion a bin ora cu oposicion a remarca cu lo tin un 'toezegging pa 1500 camber extra di all inclusive, mientras cu ta bringando e concepto aki. Segun e mandatario den e ley actual no tin nada di 1500 camber All-inclusive, pero tin un cantidad di mas di 500 pa 600 camber di All-inclusive cu tambe por tin un expansion riba dje. Oduber ta considera cu miembro di oposicion Dangui Oduber ta biba den mundo di fantasia pa bin cu un tema asina. 

ALL INCLUSIVE NA SAN NICOLAS

E ley ta duna esnan cu ta crea un hotel na San Nicolas tin e posibilidad pa algun camber di All-inclusive, pero pa locual ta trata e hotelnan na High Rise Hotel pabao di brug tabata bon cla cu Gobierno no lo bay di acuerdo cu ningun All-inclusive mas. Tambe e mandatario kier clarifica loke cu oposicion ta trece padilanti na unda cu lo a menciona cu e mandatario lo a duna casi 1600 camber na hotelnan nobo cu ta biniendo, esaki no ta cuadra cu berdad. "Sinembargo si logra haya un hotel All-inclusive pa habri na San Nicolas esaki ta bay ta un parti cu lo bay apoya sigur sigur pa asina San Nicolas tambe por haya e desaroyo turistico y crece grandemente" Oduber a finalisa bisando. Dialuna awor Oduber ta reuni atrobe cu AHATA riba e tema di e ley di All-inclusive.