Aruba no ta precupa ainda pa virus di Ebola

Posted on 8/9/2014, 5:17 PM AST | Updated on 8/9/2014, 5:24 PM AST

ORANJESTAD – Mientras cu World Health Organization (WHO) a bati alarma grandi pa e virus di Ebola (yama pa riu Ebola Valley den e pais africano Congo (ex Zaire)), na Aruba no tin precupacion ainda pa un posibel caso di infeccion. Un di e representantenan di departamento di salud na Aruba (DESPA) na Aruba, Eugene Maduro a sigura cu na Aruba alarma no a wordo bati, y tampoco tin caso di e virus aki. No obstante esey, ta vigilando e situacion di serca cu instancianan internacional pa cualkier eventualidad.

E unico precupacion cu tin den nos hemisferio, ta Merca cu tin dos persona infecta cu ta bou di tratamento estricto, y un persona cu lo tin e simptoma na Canada. Fuera di esey, no tin mas persona publicamente conoci cu ta infecta cu e virus of cu tin posibilidad pa haya esaki. Pa un persona wordo contagia, e persona mester tin contacto hopi cerca cu un persona cu ta experimentando e sintomanan di keintura di Ebola. E contacto ta sosode via likido corporal cu por ta sodo, orina, diarea y/of sanger. Otro forma ta materialnan contamina cu sanger y corta cu e persona infecta tin riba su curpa.

SIMPTOMA DI EBOLA

E sintomanan ta similar na un griep y por wordo facilmente confundi pa un griep durante un diagnostico. Keintura fuerte, dolor di spiernan y join, zwak, dolor di garganta y cabes cual ta hopi parce griep. Sin embargo e persona infecta cu Ebola ta presenta diarea, sacamento, grawatashi, wowonan cora y sangramento paden y pafo di curpa, y cu bo higra y riñon ta wordo afecta. E virus ta ataca e celnan cu ta paden di e adernan fini . Nan no ta capaz di para e sangramento loke ta conduci na morto di e persona pa motibo di e perdida di sanger. E persona infecta cu e virus por presenta e sintomanan entre dos dia y tres siman.

PASONAN MUNDIAL PA BIAHERONAN EVITA E VIRUS EBOLA

Evita biahamento no esencial (specialmente pa Liberia, Guinea & Sierra Leone)

Riba 20 aeropuerto mericano , incluyendo JFK & Newark, tin staf extra entrena pa identifica e simptoma di Ebola. Esnan detecta ta wordo isola mesora. Ya cu ainda e virus no ta wordo transmiti via aire, sino via contacto so (likido den varios forma y tambe di sanger), biaheronan ta wordo recomenda pa laba nan man frecuentemente y tapa cualkier herida cu nan por tin, prome cu nan biaha.