A lansa un "Rapid Response Team" pa asisti patruya riba caya

ORANJESTAD - Cuerpo Policial a lansa un "Rapid Response Team". Tanto diabierna anochi como diasabra anochi e ekipo special di Polis, cu a haya e nomber "Rapid Response Team" tabata activo. A traha por lo menos 14 ora pa patruya den barionan na San Nicolas, na Noord, na Oranjestad y den e area di hotelnan High Rise.

FIN DI SIMAN

Durante e fin di siman e ekipo special aki a asisti nan coleganan di districto di San Nicolas durante un asistencia na Flamboyanstraat. A controla na e actividad di hubentud banda di Bushiri Hotel, a asisti polisnan di Noord na un asistencia pa un caso di hortamento cu tabata tumando luga den un cas na Safir y a brinda asistencia na Pos Chikito, na altura di Dior Supermarket pa un auto Tercel cu dos homber aden cu supuestamente tabata arma.

MAS EKIPO DEN CUERPO

Di e forma aki ta crea mas ekiponan den cuerpo policial mes, cu por activa mesora y asisti e patruyanan den nan trabounan, specialmente den oranan druk di anochi y marduga. Por mira caba cu e ta dunando bon resultado, pasobra na final di dia, mas polis riba caya ta mas wowo y mas man pa ora mester planta respet riba caya. No solamente e trabou represivo ta importante, pero ta purbando pa haci mas trabou preventivo tambe, dor di core den bario y pa e malhechornan nota presencia di polis y pa nan ta consciente di e consecuencianan den caso cu faya cu ley.