Hessen: Ta aplica norma nacional pa admiti studiante na HAVO/VWO

ORANJESTAD  - Gobierno ta aplica norma nacional pa admiti studiante na HAVO/VWO. Asina inspector general di enseñansa John Hessen a declara. Segun Hessen, e anuncio di e cambio den e forma con ta admiti studiantenan di scol basico pa HAVO/VWO, a conta cu un sosten grandi den comunidad. Specialmente pasobra na prome instante e scolnan a comunica resultado di admision a base di resultado di e Colegiotoets, prome cu e comision a keda cla cu su recomendacionnan a base di e ley y procedura nobo cu a keda anuncia. Gobierno mesora a cay aden y para e proceso pa sigura cu tur studiante tin e mesun oportunidad, y pa sigura cu tur aspecto ta wordo teni na cuenta. 

DECRETO GUBERNAMENTAL

Hessen a enfatisa cu ta por medio di un decreto gubernamental (M.B.), cu minister di enseñansa, Michelle Hooyboer-Winklaar a institui un comision pa investiga e forma corecto pa admiti studiantenan na Colegio, tanto Colegio pariba como Colegio Arubano. E comision a conta cu participacion di tur partner den e cadena di enseñansa, incluyendo e dos Colegionan.

COLEGIO TOETS

Anualmente studiantenan di scol basico ta traha un “Colegio Toets”. E Inspector General di Enseñansa a enfatisa cu no por ta asina cu solamente un “toets” cu e mucha ta pasa un dia, ta dicidi su futuro. Mester ta asina cu loke a haci seis aña largo for di 1ste klas te cu 6de klas den scol basico, tambe mester conta na un of otro manera y pone banda di dje. Esey ta e evaluacion cu e Minister a inclui den e MB.

DIFERENTE OPCION

A sondea diferente opcion y a analisa un ke otro y a yega na e norma, cu lo tuma e cifra di e toest, cu tin su balor y banda di e toets ta tuma e cifra promedio riba rapport tanto di “taal” como “rekenen”, di tanto 5de y 6e klas. Ta conta nan hunto cu e toets y yega na un promedio di esey, asina e Inspector General a indica.

ERA NOBO

Cu esaki ta cuminsa un era nobo den e forma con ta admiti muchanan cu caba scol basico y cu tin puntonan asina halto cu por continua nan estudio na nivel HAVO of VWO. E proceso a cambia di algun aña pasa caba den forma di un Ciclo Basico pa dicidi e direccion exacto, pero cu e adaptacion awor ta duna e decision di aceptacion mas balansa. Den transcurso di algun siman e comision lo bolbe bin hunto pa sigui haci e evaluacionnan necesario y prepara pa duna conseho riba normanan di admision pa aña escolar 2017-2018. Un di e aspectonan importante cu lo wordo evalua pa siguiente aña escolar ta e toets como un di e componentenan cu ta considera pa admision y tambe e conseho di e scol basico cu ta wordo considera pa e grupo di alumno cu por traha e toets.