DIMAS: Alerta pa malpractica di empresa ficticio, tramitador y posibel estafa

ORANJESTAD - DIMAS a ranca e bel como alerta cu tin cierto consultants of bufetenan cu ta haci nan mes culpabel na malpractica. Asina NoticiaCla.com a compronde e siman aki. NoticiaCla.com tin informacion confirma cu  personanan cu ta fungi como  consultantsnan ta ofrece servicionan di asisti den tramita permiso di estadia y tin ta ofrece pa nan empresanan cu nan ta opera para garante -, contra pagonan substancial ,- pa "fix" permisonan di estadia y trabou.  

MIHO PORVENIR

Hopi ta e personanan stranhero cu ,- kisas en busca di un mihor porvenir ,- a cay pa e oferta di e supuesto consultantsnan /empresanan  aki.  For di esaki a bin kehonan na DIMAS cu ta entre otro: Pago di sumanan exorbitante na un consultant pa asisti cu e proceso di entrega di un aplicacion pa un permiso pa tempo defini pa e tramite. Alabes e consultant ta ofrece pa su negoshi para garante pa e persona, pero no tin vacatura ni trabou ni ta paga un salario. Tambe tin caso unda cu e trahador stranhero mensualmente mester paga e consultant / empresa sumanan pa "impuesto" . E personanan stranhero  ta ser menasa cu deportacion si e bay conta of keha respecto e malpractica of estafa. Otro keho cu tin ta cu  e tramitadora/ empresa ta indica cu lo tin conexion den tur ministerio y departamento y di pues por "fix" exoneracion y / of ta haya un trato preferencial. Ademas ta presenta documento cu ta parce original (por ehempel prueba di entrega di peticion na DIMAS) pero ta falso of falsifica. Y asina tin mucho mas keho cu a keda raporta. 

REVOCA PERMISO 

Tin varios caso y empresanan actualmente bou investigacion y DIMAS ta conseha Minister pa procede pa revoca permisonan di estadia cu a keda emiti bou di garantia di cierto empresanan / consultants di cual a constata cu nan no ta(wata) operacional, sino ta fungi como empresa ficticio y unicamente cu e meta pa - contra pago di sumanan -  saca un permiso di estadia pa personanan stranhero.  

DENUNCIA PENAL PA TRAFICACION DI HENDE, ESTAFA Y FRAUDE 

A compronde cu DIMAS ta recomenda cu pa por frustra tipo di practicanan cu ta di mala fe, ta necesario pa haci denuncia (aangifte). Personanan cu a bira victima of ta den un situacion asina, por cuminsa un caso civil, pero tambe mester depone nan keho penal contra e consultants y empresanan ficticio aki pa di es manera ataca e malpractica aki tambe penalmente.  

LISTA DI ADVERTENCIA

Como un di e advertencianan, DIMAS ta bay pone na su entrada principal proximamente y riba su website un lista di advertencia conteniendo nombernan di e consultants y /of empresanan ficticio di cual ya a constata e malpractica aki y cu e meta pa preveni cu mas personanan cay den un situacion indesea.  

BATI E BEL  

Ta pidi personanan stranhero cu a of ta den un situacion laboral cu tipo di empresanan ficticio, of a pasa den tipo di experiencia cu consultants/empresa di mala fe y nos comunidad en general pa no bira cara of keda keto, pero pa yuda stop e tipo di malpracticanan aki dor di meldo esaki na e instancianan competente.  

WEBSITE

Por manda e notificacion pa DIMAS via di nan website  www.dimasaruba.com   (seccion klachten) of por deposita e melding aki (cu por ta uno anonimo) den nos buzon cu un seccion pa kehonan, cu ta ubica den e sala di espera. DIMAS ta ubica na Paardenbaaistraat 11.