Gobierno y AHATA no a haya otro ainda den reunion pero lo sigui purba

ORANJESTAD - Mientras cu e reunion diahuebs entre gobierno di Aruba y e gremio hotelero AHATA (Aruba Hotel & Tourism Association) no a yega na nada concreto riba e tema di all inclusive, lo haci un intento mas dialuna otro siman. Segun e mandatario, durante e reunion aki, a bin un proposicion di parti e operadornan di hotel, aunke no a bisa kico e plan aki tabata contene. E mandatario di su banda a mustra cu ela percura pa tur cu a traha riba e ley di All-inclusive tabata presente durante e reunion aki. Entre otro huristanan di e diferente buffetnan di abogado, ministerio di Turismo, miembronan di oficina di turismo y tambe Directie Wetgeving.

DISCUSION TA CONTINUA

Manera ta conoci den e ultimo simannan aki a reuni cu diferente gremionan unda a dialoga extensamente riba e proposicion di ley pa cu regulacion di acomodacionnan All-inclusive cu lo keda trata dentro di poco den Parlamento di Aruba. Minister Oduber ta indica cu den comunidad ta reina e sentimento cu regulacion di e fenomeno di All-inclusive mester tuma luga. AHATA di otro banda tin cierto problema cu e ley y riba esey tin cu traha ariba ainda. Segun e mandatario a sigura tur hende durante e reunion cu "Aki no tin discusion di kico Minister ta desea pero kico ta bon na bienestar general di Pais Aruba" Sr. Oduber ta comenta.

YEGA MAS CERCA DI UN CONSENSO POSIBEL

E mandatario ta reitera e pensamento cu na mesa ta unda ta yega na alternativanan, solucionnan y si no por yega na solucionnan, lo purba yega mas cerca di un consenso cu ta posibel. Lo reuni un biaha mas dialuna awo pa mira si por yega na otro prome cu trata e ley aki den Parlamento di Aruba.