Herde: Aruba a haci proposicion pa sali di impasse 'geschillenregeling'

DEN HAAG - Aruba a haci proposicion pa sali di impasse 'geschillenregeling'. Asina lider di fraccion di AVP Rene Herde a bisa Noticiacla.com diahuebs merdia durante e programa 'noticiacla-merdia' na Power FM. Segun Herde, esey tabata necesario pasobra dado momento durante e reunion di IPKO trahando e tema, cos a pega formal. Y pa evita cu partidonan lo a sali for di otro sin nada, y cu e chens cu e proposicion di minister Ronald Plasterk lo a bira e proposicion, a haci e intento ey. 

PROPOSICION

E proposicion cu Herde a haci ta ensera un elaboracion mas concreto di e condicionnan cu cua un areglo di conflicto mester cumpli. Como alternativa pa e Corte Supremo di Reino (Hoge Raad) como e organo cu lo ta encarga cu e areglo di conflicto, a propone e seccion di Raad van State cu ta duna veredicto final den caso di conflictonan den maneho. E seccion aki lo por trata conflictonan riba e interpretacion strictamente legal di Statuto. Pa loke ta e conflictonan riba maneho, a propone pa en bes di laga un hues dicta sentencia den asuntonan di maneho, pa laga e seccion di conseho di Raad van State duna conseho. E proposicion aki a wordo bon ricibi. Cu esaki a logra saca e discucionnan for di e impasse. Awor tur delegacion ta bay studia e proposion aki pa wak si e ta cumpli cu e condicionnan y si e ta practico. Si logra haya tur delegacion di e cuatro paisnan pa sostene e proposicion aki, lo por hinca esaki den e ley y asina haya suficiente sosten pa e ley den Parlamento Hulandes.

SOSTEN POLITICO

Pa aproba un ley cu ta formalisa un "areglo di conflicto" entre paisnan di Reino, mester haya suficiente sosten den Parlamento Hulandes. Ayera mainta a surgi e situacion cu e proposicion di ley di e tres parlamentonan di Aruba, Corsou y Sint Maarten, manera presenta e siman aki, no lo haya suficiente sosten den parlamento Hulandes. Cu e proposicion cu Rene Herde a presenta den nomber di e delegacion di Aruba, tin mas chens pa haya suficiente sosten. Si no a haci e proposicion y si a keda den e impasse cu a surgi, ta e proposicion di Minister Plasterk lo a haya sosten y wordo aproba. Rene Herde': "Ya cu e proposicion di minister Plasterk no ta cumpli cu e exigencianan palabra aña pasa, nos lo a haya un areglo di conflicto cu no lo a yuda nos den niun forma. Nos lo a keda den e mes un situacion cu no ta funciona. P'esey a haci e proposicion. Cu e proposicion cu nos a haci, e concepto di ley di Aruba, Corsou y Sint Maarten, tin mas chens di haya sosten den Parlamento Hulandes y bira e ley cu lo ta mas manera no ta desea."E delegacion di Aruba tambe a propone pa trata e proposicion di ley aki prome cu fin di aña 2016. Si logra esey, lo tin un areglo di conflicto na vigor, prome cu eleccion na Hulanda na maart 2017. "Ta importante pa trata e ley aki prome cu eleccion. Awor aki nos por logra haya un mayoria den Parlamento Hulandes. Nos no sa con e constelacion di Parlamento lo ta despues di eleccion." Herde a informa NoticiaCla.com.